१
सर्वत्र हाहाकार छ तर कतै उज्यालो छैन
निस्तब्ध, अन्धकार र हाहाकार छ तर कतै राहत छैन
एउटा भयानक अन्धकारले सर्वत्र ढाकेको छ
तर कतै त्यसको उज्यालोको गन्ध पनि छैन ।

२
भयानक स्तब्धताले वाणी पाएको छैन
भयानक हाहाकारले मौनता पाएको छैन
मौनताले एउटा शब्द बोल्न पनि पाएको छैन
शब्द स्वयं कुँजिएर वाणी बन्न सकेको छैन ।

३
स्वयं आतङ्क डराएर लुक्न गएको छ
आतङ्क डराएर आतङ्कित हुनु परेको छ
राज्य आतङ्क सायद त्यही हुनुपर्छ
आतङ्क स्वयं आतङ्कबाट जोगिन सहारा खोज्दै छ ।

४
रहर होइन, बाध्यता होइन र विवशता पनि होइन
जसको धर्म नै होइन, कर्म नै होइन र संस्कृति नै होइन
त्यसैलाई संपूर्ण धर्म, कर्म र संस्कृतिको जिम्मा दिएपछि
त्यहाँ आतङ्कबाहेक केको राज्य सम्भव छ त ?

५
अनुभव सम्भवतः स्वयं एउटा सहारा हो 
आतङ्कबाट मुक्ति पाउने तर..
निर्भयता मात्र मुक्तिको रामबाण हुन सक्छ
निर्भयता मात्र उज्यालोको द्योतक हुन सक्दो रहेछ ।

६
उज्यालोको खोजीमा हिँड्नेहरूलाई अन्धकारले छेक्न सक्दैन
अन्धकारको खेती गर्नेहरूले पनि उज्यालोलाई छेक्न सक्दैनन् ।