प्रदेश १ का मन्त्री आङ्बुहाङको मन्त्री पद चट् !
सर्वोच्च अदालतले एमाले र माओवादी केन्द्रलाई ब्युँताइदिएपछि 'ठूलो भाग' पाउने लोभमा सत्ताको नेतृत्व गरिरहेको नेकपा (एमाले)मा प्रवेश गरेर प्रदेश १ को आर्थिक मामिला तथा योजनामन्त्री बनेका मओवादी केन्द्रका प्रदेश सांसद टंक आङ्बुहाङले स्पष्टीकरणको जबाफ नदिएपछि उनलाई पार्टीले पदमुक्त गरेको छ । अब मन्त्री बनेको १० दिनपछि नै आङबुहाङको सांसद पद खोसिने भएको छ ।
माओवादी केन्द्रले पार्टीको हितविपरीत अर्कै पार्टीमा प्रवेश गरी मन्त्री बनेको र २४ घण्टे स्पष्टीकरणको जबाफ नदिएको भन्दै आङ्बुहाङलाई सांसद पदबाट मुक्त गरेको सूचना प्रदेशसभा सचिवालयलाई गराएको छ ।
निर्वाचित दलको निर्णय र अनुमतिबिना अरु नै दलको मन्त्रिपरिषदमा सहभागी भएको भन्दै १६ चैतमा बसेको माओवादी केन्द्रको संसदीय दलको बैठकले आङ्बुहाङलाई २४ घण्टे स्पष्टीकरण सोध्ने निर्णय गरेको थियो । सोही निर्णयबमोजिम आङ्बुहाङलाई १७ चैतमा माओवादी केन्द्रका प्रमुख सचेतक झलकबहादुर मगरले २४ घण्टाभित्रमा स्पष्टीकरण पेस गर्न निर्देशन जारी गरेका थिए ।
मन्त्री आङ्बुहाङलाई प्रदेश– १ स्थित माओवादी केन्द्र संसदीय दलको बैठकको निर्णयअनुसार अध्यक्ष पुष्पकमल दाहाल प्रचण्डले पार्टीको साधारण सदस्यसमेत नरहने गरी निष्कासन गरेका छन् ।
मन्त्री आङ्बुहाङ माओवादी केन्द्रको उम्मेदवार बनी ताप्लेजुङ ‘ख’बाट निर्वाचित प्रदेशसभा सदस्य हुन् । उनी माओवादी केन्द्र संसदीय दलको नेतासमेत थिए । आङ्बुहाङ नेकपा (एमाले)मा प्रवेश गरेर आर्थिक मामिला तथा योजनामन्त्री बनेपछि १६ चैतमा माओवादी केन्द्रले उनलाई संसदीय दलको नेताबाट हटाउँदै इन्द्र आङ्बोलाई संसदीय दलको नेता चयन गरेको थियो ।
