अमेरिकाको सिकागोस्थित इलिनोइस विश्वविद्यालयका अनुसन्धानकर्ताहरूले मृत्यु भइसकेपछि पनि मानिसको मस्तिष्क क्रियाशील रहने तथ्य पत्ता लगाएका छन् । 

यसअघिका अध्ययनहरूबाट मानिसको मुटु बन्द भएपछि मानव मस्तिष्कका क्रियाकलापहरू स्वाभाविक रूपमा निष्क्रिय हुने ठानिएको थियो । तर, यस अध्ययनले मानिसको मृत्यु भएको घन्टौँपछिसम्म पनि मस्तिष्कका निश्चित कोषहरू सक्रिय रहनुका साथै केही कोषहरू त अझ ठूलो अनुपातमा वृद्धिसमेत भएका बताइएको छ ।

यूआईसीका अनुसन्धाताहरूले उक्त तथ्य मस्तिष्कका ताजा तन्तुहरूको नमुनाको जिन एक्स्प्रेसनको विश्लेषणबाट पत्ता लगाइएको कुरा साइन्टिफिक जर्नलमा प्रकाशन गरिएको छ । उनीहरूले अनुसन्धानका लागि अप्रेसनको नियमित पालोमा रहेका व्यक्तिहरूको मस्तिष्कबाट वैधानिक ढंगले नै केही ताजा तन्तुहरू निकालेका थिए ।

मृत्यु भएको धेरै घन्टा पछिसम्म पनि ग्लियल नामक कोषहरू सक्रिय रूपमा पलाइरहेका पाइएको बताइएको छ । तर, मानिसका सम्झने, सोच्ने स्नायुसम्बन्धी क्रियाकलापमा सक्रिय अर्को समूहका जिनहरू भने तीब्र गतिमा नष्ट भएको देखिएको थियो । उक्त अध्ययनका दौरान विश्लेषण गरिएका करिब ८० प्रतिशत जिन २४ घन्टासम्म सापेक्ष रूपमा स्थिर रहेका थिए ।

अनुसन्धाताहरूले उक्त अध्ययनबाट प्राप्त नतिजाले कुन जिन र कोषका प्रकारहरू स्थिर छन्, कुन चाँडै नष्ट हुन्छन् र कुनमा अझ वृद्धि हुन्छ भन्ने कुराको ज्ञान हासिल भएको हुँदा त्यसले मृत्युपछि गरिने मानव मस्तिष्कको अध्ययनबाट प्राप्त परिणामलाई अझ राम्ररी बुझ्न सकिने दाबी गरेका छन् ।