नेकपा (एमाले)का अध्यक्ष केपी शर्मा ओली खेमाले असन्तुष्ट माधव नृपाल खेमाका नेपाललगायत ४ जना नेतालाई कारबाही गरिसकेको छ । अब ओली खेमाको प्रहार नेपाल खेमाका भ्रातृ संगठनमा हुन थालेको छ ।

भर्खरै विद्यार्थी संगठन अनेरास्ववियुले ३ जना नेतालाई कारबाही गरेको छ । अनेरास्ववियुले खनाल-नेपाल खेमामा लागेका ३ जना नेतालाई संगठनको साधारण सदस्यबाटै निश्कासन गरेको जनाएको छ ।

अनेरास्ववियुका अध्यक्ष ऐन महरद्वारा मंगलबार जारी विज्ञप्तिमा अनेरास्ववियुका निवर्तमान सचिवत्रय सुदेश पराजुली, वसिम आलम र आरती लामालाई संगठनको साधारण सदस्यसमेत नरहने गरी निश्कासन गरिएको उल्लेख छ ।

संगठनको विधान र अनुशासनविपरीत कार्य गरेको उनीहरूमाथि आरोप लगाइएको छ । यसअघि उनीहरूलाई सुरुमा ३ दिने र त्यसपछि २४ घण्टे स्पष्टीकरण सोधिएको थियो । स्पष्टीकरणको जबाफ नदिई संगठनको निर्देशनलाई अटेर गरेको आरोपमा उनीहरूमाथि कारबाही गरिएको बताइएको छ ।