साताको तेश्रो दिन मंगलबार नेप्से सूचक नयाँ उचाई चुमेको छ । सोमबारको उच्च विन्दुको रेकर्ड ब्रेक गर्दै आज नयाँ रेकर्ड बनाएको हो । आज नेप्से सूचक १५.७२ अंक वृद्धि भई २६७४.४६ विन्दुमा पुगेको छ।
आज नेप्सेमा सूचीकृतमध्ये २१३ कम्पनीका कारोबार भयो । जम्मा १ करोड ६१ लाख ८ हजार ४९९ कित्ता सेयर ७ अर्ब ४७ करोड ७७ लाख ९५ हजार ७३६ रुपैयाँ बराबरमा कारोबार भयो ।
आज ११ वटा कम्पनीको सेयरमूल्यमा वृद्धि भई सकरात्मक सर्किट लागेको छ । चिलिमे हाइड्रोपावर, चन्द्रागिरी हिल्स, एनआईसी एसिया लघुवित्त, युनिभर्सल पावर, युनाइटेड इदी मर्दी, वमी लघुवित्त, पञ्चकन्या माई हाइड्रोपावर, महिला लघुवित्त, सान्जेन लघुवित्त, शिवश्री हाइड्रोपावर र छ्याङ्दी हाइड्रोपावरको सेयरमूल्यमा १० प्रतिशतको हाराहारीमा वृद्धि भएर पोजेटिभ सर्किट लागेको हो ।त्यसैगरी बुटवल पावर, रसुवागढी हाइड्रोपावर र जोशी हाइड्रोपावरको शेयरको मूल्यमा पनि ९ प्रतिशतभन्दा बढीले वृद्धि भएको छ।
आज साल्ट ट्रेडिङ कर्पोरेसनको शेयरमूल्यमा १० प्रतिशत नकरात्मक सर्किट लागेको छ भने सानिमा जनरल इन्योरेन्स र अजोड इन्स्योरेन्सको शेयरमूल्यमा पनि ८ प्रतिशत भन्दा ज्यादा गिरावट आएको छ । १३ वटा उपसूचकमध्ये ७ वटा उपसूचकमा आज हरियाली छाएको छ । बाँकी उपसूचक ओरालो लागेको छ ।