विश्व स्वास्थ संगठन (डब्लूएचओ)ले कुनै पनि प्रयोगशालामा कोभिड- १९ को जीवाणुसँग सम्बन्धित जीवाणु फेला नपरेको जनाउँदै कोरोना भाइरस कुनै प्रयोगशालाबाट आएको भन्ने अनुमान अत्यन्त असुहाउँदो भएको टिप्पणी गरेपछि बुधबार अन्तर्राष्ट्रिय वैज्ञानिकहरूको एउटा समूहले यो भाइरसको उत्पत्तिका सम्बन्धमा नयाँ अनुसन्धान सुरु गर्न आह्ववान गरेको छ । यसअघि गत हप्ता चीन र डब्लूएचओले कोभिड- १९ भाइरस कुनै ल्याबबाट आएको नभएर वन्यजन्तुबाट आएको हुन सक्ने सम्भावना प्रबल रहेको उल्लेख गर्दै एउटा विस्तृत विवरणसहितको प्रतिवेदन सार्वजनिक गरेका थिए ।

अझ गहिरो एवं प्रभावकारी अध्ययनका विधिहरूको विश्लेषणसमेत गरिएको युरोप, अमेरिका, अस्ट्रेलिया र जापानका २४ जना वैज्ञानिकहरूले संयुक्त रूपमा लेखेको एउटा खुला पत्र द न्युयोर्क टाइम्सले प्राप्त गरेको उल्लेख गर्दै  हिन्दुस्तान टाइम्सले जनाएअनुसार वैज्ञानिकहरूद्वारा लेखिएको उक्त पत्रका कारण भाइरससम्बन्धी गरिने प्रयोगशालाजन्य क्रियाकलापहरूको  अनुगमन, नियमन एवं निश्चित प्रकारका भाइरसहरूको अध्ययनका लागि आवश्यक कडाइ गरिनुपर्ने आवाजहरू प्रस्फुटित हुन थालेका छन् ।

सर्वप्रथम चीनको वुहानमा सन् २०१९ मा फेला परेको उक्त भाइरसको वास्तविक उत्पत्तिस्थल र उत्पत्तिको स्रोत पत्ता लगाउनुपर्ने उल्लेख गर्दै आफ्नो कुनै एउटा देशतर्फ औँलो ठड्याउने उद्देश्य नभएर सम्पूर्ण मानव जातिको हित एवं सुरक्षाका खातिर त्यस भाइरसका बारेमा विस्तृत अनुसन्धान आवश्यक रहेको दाबी गर्दै लेखिएको उक्त पत्रमा जैविक सुरक्षासम्बन्धी विज्ञहरूसमेत सम्मिलित टोली गठन गरी या त डब्ल्लूएचओ अथवा अन्य कुनै मुलुकले त्यससम्बन्धी अनुसन्धान गर्नुपर्ने माग गरिएको छ ।

चीनमाथि विश्वभर कोभिड- १९ भाइरस फैलाएको आरोप लाग्दै आएको छ । उक्त भाइरसको संक्रमणका कारण हालसम्म २८ लाखभन्दा बढी मानिसहरूको मृत्यु भइसकेको छ ।