स्रष्टा घनश्याम पथिकको नयाँ उपन्यास 'छुई' आज सार्वजनिक गरिएको छ । काठमाडौंमा आयोजित एक कार्यक्रममा हास्य कलाकार मनोज गजुरेल, नायिका ऋचा शर्मा र मिस नेपाल शृङ्खला खतिवडाले उक्त उपन्यास सार्वजनिक गरेका हुन् ।

कार्यक्रममा गजुरेलले खतिवडा र शर्मासँग 'छुई संवाद' गरेका थिए । नेपाली समाजमा युवती/महिलामा हुने रजस्वलालाई लिएर लेखिएको उपन्यासमा नेपाली समाजको रजस्वलालाई हेर्ने र महिनावारी भएका युवती/महिलालाई गर्ने व्यवहारलाई अनेक कोणबाट प्रस्तुत गरिएको वक्ताहरूको भनाइ थियो ।

लेखक पथिकले सामाजिक विकृतिको उक्त पाटोका कारण नेपाली महिलाले खेप्नुपरेको तनावलाई उपन्यासमा प्रस्तुत गरेको बताए । यो समस्या आमसमस्या भएकाले यसमा सुधारको खाँचो रहेको उनको भनाइ थियो ।

शिखा बुक्सले प्रकाशन गरेको 'छुई'को मूल्य ४२५ रुपैयाँ छ ।