देशभित्रका प्रगतिशील धार तथा शरणार्थीसम्बन्धी निकायहरूको विरोधपछि अमेरिकाका राष्ट्रपति जो बाइडेनले न्यून सङ्ख्याले अमेरिकी मान्यताको प्रतिनिधित्व नगर्ने जनाउँदै अमेरिकाले स्वीकार गर्ने शरणार्थीको सीमालाई १५ हजारबाट बढाएर ६२ हजार ५०० बनाउने बताएका छन् ।
पछिल्लो समय अमेरिका-मेक्सिको सीमामा ठूलो सङ्ख्यामा अमेरिका प्रवेश गर्न चाहने मानिसहरूको घुइँचो लागेकाले थप मानिसहरूलाई प्रवेश दिनेबारे बाइडेन चिन्तित रहेको जनाइएको थियो ।
पूर्वराष्ट्रपति बराक ओबामाको कार्यकालको अन्तिम वर्षमा रहेको १ लाख १० हजार शरणार्थीलाई प्रवेश दिने सीमा रहेकामा राष्ट्रपति ट्रम्पले आफ्नो अन्तिम वर्षको कार्यकालमा हालसम्मकै न्यून १५ हजारमा झारेका थिए ।
यसअघि गत अप्रिलमा गरिएको एउटा आपतकालीन घोषणामा बाइडेनले १५ हजारसम्म शरणार्थीलाई प्रवेश दिने विषयलाई मानवीय आधार र राष्ट्रिय हित दुवैले पुष्टि गरेको बताएका थिए ।
राष्ट्रपति बाइडेनले त्यसबेला सोमालिया, सिरिया र यमनबाट हुने पुनर्वास कार्यक्रममाथिको प्रतिबन्ध हटाएका थिए भने अफ्रिका, मध्यपूर्व र मध्यअमेरिकाका लागि थप कोटा छुट्याएका थिए ।
उनको त्यो निर्णयको शरणार्थीसम्बन्धी समूह र आफ्नै दलका सदस्यहरूबाट विरोध भएपछि ह्वाइट हाउसले मे महिनामा सङ्ख्यामा पुनर्विचार गर्ने बताएको थियो ।
बाइडेनको पछिल्लो निर्णयको अन्तर्राष्ट्रिय रेस्क्यु कमिटीसहितका शरणार्थी समूहहरूले स्वागत गरेका छन् ।