मध्य भोटेकोसी जलविद्युत कम्पनी लिमिटेडले २१ वैशाखदेखि आयोजना प्रभावित र सिन्धुपाल्चोक जिल्लाका अन्य क्षेत्रका बासिन्दालाई साधारण शेयर (आईपीओ) निश्कासन गरेको छ ।
कम्पनीले पहिलो चरणमा कम्पनीले प्रतिशेयर १०० रुपैयाँ अंकित दरका कुल ६० लाख कित्ता साधारण शेयर निश्कासन गरेको हो । निश्कासन गरिने कुल कित्तामध्ये ३० प्रतिशत अर्थात् १८ लाख कित्ता आयोजना प्रभावित क्षेत्र सिन्धुपाल्चोक जिल्लाको भोटेकोसी गाउँपालिका वडा नं.- १ र ५, बाह्रबिसे नगरपालिका वडा नं.- ५ र ६ तथा बाह्रबिसे नगरपालिका वडा नं.- ७ र ८ मा स्थायी बसोबास गर्ने बासिन्दाहरूका लागि छुट्याइएको छ भने बाँकी ७० प्रतिशत अर्थात् ४२ लाख कित्तामा सिन्धुपाल्चोक जिल्लाको अन्य क्षेत्रमा बसोबास गर्ने बासिन्दाहरूलाई छुट्याइएको छ ।
कम्पनीले गत वैशाख ५ गते नेपाल धितोपत्र बोर्डबाट कुल १ करोड ५० लाख कित्ता आईपीओ निश्कासनको अनुमति पाएको थियो, जसमध्ये पहिलो चरणमा आयोजना प्रभावित क्षेत्रका बासिन्दाको निश्कासन गरेको हो । बाँकी ९० लाख कित्ता भने कम्पनीले दोस्रो चरणमा सर्वसाधारणका लागि निश्कासन गर्नेछ ।
पहिलो चरणको उक्त आईपीओमा लगानीकर्ताहरूले छिटोमा ४ जेठ र ढिलोमा २० जेठसम्म आवेदन दिन सक्नेछन् । लगानीकर्ताले न्यूनतम १० कित्ता शेयर खरिदका लागि आवेदन दिनुपर्नेछ भने अधिकतम ४०० कित्ताका लागि आवेदन दिन पाउनेछन्।
आईपीओमा ग्लोबल आईएमई बैंक, लक्ष्मी बैंक, मेगा बैंक, नेपाल क्रेडिट एण्ड कमर्स बैंक, सिन्धु विकास बैंक, नेपाल इन्भेष्टमेन्ट बैंक, सिभिल बैंक, प्रभु बैंक, नेपाल बंगलादेश बैंक, कुमारी बैंक, बैंक अफ काठमाण्डू र एनआईसी एसिया बैंकका सिन्धुपाल्चोक शाखा कार्यालयबाट आवेदन दिन सकिनेछन् ।
कम्पनीको आईपीओ निश्कासन तथा बिक्री प्रबन्धक ग्लोबल आईमएई क्यापिटल रहेको छ ।