केही खेलाडीलाई नै कोरोना संक्रमण देखिन थालेपछि इन्डियन प्रिमियर लिग (आईपीएल) अनिश्चितकालका लागि स्थगित गरिएको छ ।
इन्डियन प्रिमियर लिग गभर्निङ काउन्सिल र भारतीय क्रिकेट कन्ट्रोल बोर्ड (बीसीसीआई)को आकस्मिक बैठकले खेलाडी र कर्मचारीको स्वास्थ्य सुरक्षामा कुनै सम्झौता नगरिने उल्लेख गर्दै जारी आईपीएल, २०२१ स्थगित गर्ने निर्णय गरेको जनाइएको छ ।
सोमबार साँझ चेन्नाई सुपर किंग्सका प्रमुख कार्यकारी अधिकृत काशी विश्वनाथन, बलिङकोच लक्ष्मीपति बालाजी, एक जना सफाइ कर्मचारी, कोलकाता नाइट राइडर्सका वरुण चक्रवर्ती र सन्दीप वारियरलाई पनि कोरोना संक्रमण पुष्टि भएको थियो ।
आज मंगलबार दिल्ली क्यापिटल्सका खेलाडी अमित मिश्रा र सनराइजर्स हैदरावादका खेलाडी ऋद्धिमन साहलाई पनि कोरोना संक्रमण पुष्टि भएपछि तत्कालका लागि आईपीएल स्थगित गरिएको भारतीय क्रिकेट कन्ट्रोल बोर्डले जनाएको छ ।
आज साँझ सनराइजर्स हैदरावाद र मुम्बई इन्डियन्सबीचको खेल्ने तालिका थियो ।
आईपीएलको जारी सिजनमा दिल्ली क्यापिटल्स १२ अंकसहित शीर्ष स्थानमा रहेको छ भने चेन्नाई र रोयल च्यालेन्जर्स बेङ्लोर १०/१० अंकसहित दोस्रो र तेस्रो स्थानमा रहेका छन् । दिल्ली र पन्जाब किंग्सले ८/८ खेल खेलेका छन् भने बाँकी टिमले ७/७ खेल मात्र खेलेका छन् ।