विगत २४ घण्टामा हालसम्मकै धेरै व्यक्तिहरूको कोरोना संक्रमणबाट ज्यान गएको छ । उक्त अवधिमा ५८ जनाको मृत्यु भएको हो । यससँगै कोरोना संक्रमणबाट हालसम्म नेपालमा ३ हजार ४७५ जनाको मृत्यु भएको छ ।

सोही अवधिमा थप ८ हजार ६५९ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार २० हजार ७५६ जनाको पीसीआर परीक्षणमा ८ हजार ६०५ र ६१६ एन्टिजेन परीक्षणमा ५४ जना गरी ८ हजार ६५९ जनामा संक्रमण पुष्टि भएको हो ।

त्यस्तै, पछिल्लो २४ घण्टामा मात्र काठमाडौँ उपत्यकामा ३ हजार ८२५ जनामा कोरोना संक्रमण पुष्टि भएको छ, जसमध्ये काठमाडौँमा २ हजार ८४९, भक्तपुरमा ४५८ र ललितपुरमा ५१८ जना कोरोना संक्रमित भेटिएका हुन् । साथै सोही अवधिमा काठमाडौँ उपत्‍यकामा १५ जनाको मृत्‍यु भएको स्वास्थ्य मन्त्रालयले जनाएको छ ।

मन्त्रालयको तथ्यांकअनुसार नेपालमा हालसम्म कोरोना भाइरस संक्रमितको संख्या ३ लाख ५९ हजार ६१० रहेको छ । बुधबारसम्म कोरोना भाइरसको सक्रिय संक्रमितको संख्या ६६ हजार ३५२ पुगेको छ ।