नेकपा (एमाले) को बिहीबार बिहान बसेको स्थायी कमिटीको बैठकले प्रधानमन्त्री केपी शर्मा ओलीले संसदको विशेष अधिवेशनमा विश्वासको मत प्राप्त गर्नका लागि सबै दलहरुसँगको छलफललाई निरन्तरता दिने निर्णय गरेको छ ।

प्रधानमन्त्री ओलीले विश्वासको मत लिन चाहेको भन्दै यही वैशाख २७ गते का लागि राष्ट्रपतिद्वारा संसदको विशेष अधिवेशन बोलाइएको छ ।

यसअघि बुधबार माओवादी केन्द्रले सरकारको समर्थन फिर्ता लिएपछि अल्पमतमा परेका प्रधानमन्त्री ओली सोही दिन दिउँसो नेपाली कांग्रेसका सभापति शेरबहादुर देउलालाई भेट्न बुढानिलकण्ठ गएका थिए । तर कांग्रेसले प्रधानमन्त्री ओलीलाई सहयोग गर्न नसक्ने जनाएको बताइएको छ । 

कोरोना महामारी उत्कर्षमा पुगिरहेको समयमा सत्ताको खेलमा मात्र ध्यान लगाएको, जनताको जीउज्यान एवं स्वास्थमाथि लापरबाहीपूर्ण खेलबाड गरेको भन्दै ओली सरकारलगायत सबैजसो राजनीतिक दलहरूप्रति आम जनता रुष्ट देखिएका छन् ।