नेकपा (एमाले) का अध्यक्ष एवं प्रधानमन्त्री केपी शर्मा ओलीले माधव नेपाल खेमाका नेताद्धय घनश्याम भुसाल र योगेश भट्टराईसँग भेट गरेका छन् ।
यसअघि विहीबार एमालेका निलम्बित वरिष्ठ नेता माधवकुमार नेपालले राष्ट्रपति विद्यादेवी भण्डारीसँग भेटवार्ता गरेका थिए ।
प्रधानमन्त्रीले विश्वासको मत लिन भन्दै संसदको विषेश अधिवेशन बोलाइएको परिप्रेक्ष्यमा सत्तारुढ नेकपा (एमाले) का भिन्न खेमाका नेताहरूका बीचमा निरन्तर सम्वाद भइरहेको छ । तर अहिलेसम्म कुनै ठोस निष्कर्षमा नपुगेको बताइन्छ ।
अध्यक्ष ओली र नेताहरू भुसाल/भट्टराईबीचको भेट राति अबेरसम्म चलेको थियो । कुराकानीका क्रममा अध्यक्ष ओलीले आफूले महाधिवेशन आयोजक समितिको बैठक बोलाउने र उक्त बैठकमा नेपाल खेमाका नेताहरूलाई आउन आग्रह गरेका थिए । तर नेपाल समूहका नेताहरु अध्यक्ष ओलीको प्रस्तावमा सहमत नभएको बताइको छ । उनीहरु २ जेठ, २०७५ को अवस्थामा फर्किनुपर्ने पुरानै अडानमा कायम रहेका छन् ।
नेपाल खेमाले २७ वैशाख अगाडि नै विपक्षी दलहरुको बहुमत पुग्ने गरी सांसदहरुले राजीनामा दिने तयारी र राष्ट्रियसभा निर्वाचनमा नेपाली कांग्रेस, माओवादी केन्द्र र जसपाको बाबुराम भट्टराई र उपेन्द्र यादव पक्षसँग मिलेर साझा उम्मेदवार बनाउने योजना बनाएपछि अध्यक्ष ओलीलाई 'झसक' पसेको बताइन्छ ।
भेटवार्ताकै क्रम चलिरहँदा बिहीबार नै अर्थमन्त्री विष्णु पौडेलले नेपाल खेमाका योगेश भट्टराई, सुरेन्द्र पाण्डे र गोकर्ण विष्टसँग पनि कुराकानी गरेका थिए ।
उता केही घण्टासम्म चलेको राष्ट्रपति भण्डारीसँगको भेटपछि नेता नेपाल राति करिव १० बजेतिर शीतल निवासबाट निस्किएका थिए । एमाले पार्टीकै विवादमा केन्द्रित रहेको भनिएको उक्त भेट र अन्य भेटवार्तासमेतबाट कुनै सहमति भने जुट्न नसकेको जनाइएको छ ।
कोरोना महामारीले सम्पूर्ण राष्ट्र र गतिविधिहरूलाई आक्रान्त पार्दै गरेका बखत सत्तासीन नेपाल कम्युनिस्ट पार्टी (एकीकृत मार्क्सवादी लेनिनवादी) को चालचलन देखेर जनता आश्चर्ययुक्त क्रोधले व्याकुल भएका छन् ।
