थापा र देवकोटाले गरे उम्मेदवारी दर्ता, नेमकिपाबाट कृष्णबहादुर तामाङको उम्मेदवारी
नेकपा (एमाले)बाट रामबहादुर थापा बादल र स्वतन्त्र उम्मेदवार खिमलाल देवकोटाले वाग्मती प्रदेशमा राष्ट्रियसभा सदस्य उपनिर्वाचनका लागि उम्मदेवारी दर्ता गराएका छन् ।
बादलले वाग्मती प्रदेशका मुख्यमन्त्री डोरमणि पौडेलको प्रस्ताव र सामाजिक विकास मन्त्री सरस्वती बस्नेतको समर्थनमा प्रदेशको राजधानी हेटौंडास्थित निर्वाचन अधिकृतको कार्यालयमा पुगेर उम्मेद्बारी दर्ता गराएका हुन् । बादल र देवकोटाले उम्मेदवारी दर्ता गराएका हुन् ।
नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा (एमाले) को माधव नेापल खेमाले स्वतन्त्र उम्मेदवार देवकोटालाई साझा उम्मेदवार बनाएका छन् । देवकोटाका प्रस्तावकमा नेकपा (माओवादी केन्द्र) वाग्मती प्रदेशसभा संसदीय दलका नेता शालिकराम जम्मकट्टेल र समर्थकमा नेपाली कांग्रेस संसदीय दलकी प्रमुख सचेतक राधा घले छन् ।
राष्ट्रियसभा सदस्य उपनिर्वाचनमा नेपाल मजदुर किसान पार्टी (नेमकिपा) ले पनि कृष्णबहादुर तामाङलाई छुट्टै उमेदवार बनाएको छ । तामाङको प्रस्तावकमा बाग्मती प्रदेशसभा सदस्य सुरेन्द्रराज गोसाईं र समर्थकमा सिर्जना सैंजु रहेका छन् ।