आगामी २७ वैशाखको विशेष अधिवेशनमा पार्टीको तयारीलगायतका विषयमा छलफल गर्न नेपाली कांग्रेस संसदीय दलको बैठक बोलाइएको छ । बैठक आज शनिबार दिउँसो २:०० बजे बस्नेछ ।

प्रतिनिधिसभाको आगामी बैठकका सन्दर्भमा पार्टीको रणनीति तय गर्ने, पार्टीको निर्णयअनुसार छलफल गर्ने र सांसदलाई निर्देशन गर्नेलगायत विषयको कार्यसूचि रहेको कांग्रेस संसदीय दलको कार्यालयले जनाएको छ ।

मंगलबार बसेको कांग्रेसका पदाधिकारी र पूर्व पदाधिकारीको बैठकले प्रधानमन्त्री केपी शर्मा ओलीको विश्वासको मत लिने अभियानलाई असफल बनाउने निर्णय गरेको थियो ।

यसैगरी प्रधानमन्त्री एवं नेकपा (एमाले) का अध्यक्ष केपी शर्मा ओलीले शनिबार साँझ ५:०० बजे बस्नेगरी मन्त्रिपरिषदको आकस्मिक बैठक बोलाएका छन् ।

मन्त्रिपरिषदको नियमित बैठक सोमबार र बिहीबार बस्ने गरेको छ । यस्तोमा शनिबार साँझका लागि आकस्मिक रुपमा बोलाइएको बैठकलाई अर्थपूर्णरूपमा हेरिएको छ ।

स्रोतका अनुसार बैठकको एजेण्डाबारे केही जानकारी दिइएको छैन ।