आइतबार साँझका लागि प्रधानमन्त्री केपी शर्मा ओलीले बोलाएको संवैधानिक परिषद्को बैठकमा नेपाली कांग्रेस सहभागी नहुने भएको छ ।
नेपाली कांग्रेसका सभापति शेरबहादुर देउवाले शनिबार एक प्रेस विज्ञप्ति जारी गर्दै उक्त बैठकमा भाग नलिने बताएका हुन् । सभापति देउवाले सरकारले हालै ल्याएको संवैधानिक परिषद्सम्बन्धी अध्यादेश 'पार्टीगत मनसायबाट प्रेरित भएको' उल्लेख गर्दै उक्त बैठकमा भाग नलिने जनाएका हुन् ।
विज्ञप्तिमा भनिएको छ, '…संवैधानिक संरचनालाई नै भत्काउने गरी अध्यादेश जारी गरेको अवस्थामा संवैधानिक परिषद्को बैठकमा प्रमुख प्रतिपक्ष दलको नेताको हैसियतले भाग नलिने स्पष्ट गर्न चाहन्छ' ।
यसअघि नै सभामुख एवं संवैधानिक परिषद्का सदस्य अग्निप्रसाद सापकोटाले परिषद्सम्वन्धी मुद्दा अदालतमा विचाराधीन रहेकाले आफूले उक्त बैठकमा भाग नलिने जनाइसकेका छन् ।
त्यस्तै संवैधानिक परिषद्का सदस्यसमेत रहेका प्रधानन्यायाधीश चोलेन्द्रशम्शेर जबराले न्यायिक मान्यताअनुसार उक्त बैठकमा उपस्थित हुन नमिल्ने संविधानविदहरुको भनाइ छ ।
सर्वोच्च अदालतमा यसअघि प्रधानन्यायाधीश राणा उपस्थित संवैधानिक परिषदले गरेको निर्णयउपर परेका विभिन्न मुद्धाहरू राणासमेतको संवैधानिक इजलाशमा विचाराधीन रहेको अवस्था छ ।
यदी ५ जनाको संवैधानिक परिषदमा देउवा, राणा र सापकोटा उपस्थित नहुने हो भने बैठक बस्नका लागि गणपूरक संख्या (३) नपुग्ने स्पष्ट हुन्छ ।