युरो २०२० अन्तर्गत गएराति भएको खेलबाट बेल्जियम र नेदरल्याण्ड्स अन्तिम १६ मा प्रवेश गरेका छन् ।
समूह 'सी' मा रहेको नेदरल्याण्ड्सले लगातार दुई खेल जित्दै नकआउट चरणमा प्रवेश गरेको हो ।
नेदर्ल्यान्ड्सले गएराति भएको खेलमा अष्ट्रियालाई २–० ले पराजित गरेको थियो । उक्त खेलमा नेदरल्यान्ड्सका मेिम्फस डिपे र डेन्जेल डम्फ्रेजले १/१ गोल गरे ।
समुह 'सी' कै अर्को खेलमा युक्रेनले उत्तरी मेसेडोनियालाई २–१ ले हरायो । जितसँगै युक्रनेले अर्को चरणमा प्रवेश गर्ने सम्भावना जिवित राख्दा उत्तरी मेसेडोनियाको यात्रा समूह चरणमै टुंगिने निश्चित भएको छ ।
त्यस्तै समुह ‘बी’ को गएराति भएको खेलमा डेनमार्कलाई २–१ ले हराउँदै बेल्जियम पनि नकआउट चरणमा प्रवेश गरेको छ ।
घरेलु मैदान कोपन हेगेनमा गएराति भएको खेलमा डेनमार्कका योसुफ पौल्सेनले दोस्रो मिनेटमै एक गोल गरेका थिए । पहिलो हाफमा जवाफी गोल फर्काउन नसकेको बेल्जियमले दोस्रो हाफमा थोर्गन हाजार्ड र केभिन डे ब्रायनको १/१ गोलको मद्दतले डेनमार्कलाई पराजित गरी लीग चरणको एक खेल बाँकी छँदै नकआउट चरणमा प्रवेश गर्न सफल भयो ।
आज पनि युरो २०२० का तीन खेल हुनेछन् । नेपाली समय अनुसार साँझ पौने ७ बजे आयरल्याण्डको डब्लीनमा हुने खेलमा स्विडेन र स्लोभाकियाका बीचमा प्रतिस्पर्धा हुनेछ भने राति पौने १० बजे स्कटल्याण्डको ग्लास्गोमा क्रोएसियाले चेक रिपब्लिकसँग खेल्नेछ । त्यस्तै राति पौने १ बजे लण्डनमा हुने खेलमा इंग्ल्याण्ड र स्कटल्याण्डको भिडन्त हुनेछ ।