म्यान्मारमा हिंसा रोकिएन: मृतक क्याल सिनको तस्वीर भाइरल
म्यान्मारमा गत १ फेब्रुअरीमा सेनाले निर्वाचित सरकारलाई अपदस्त गरी सत्ता कब्जा गरेको विरोधमा चर्किएको शान्तिपूर्ण प्रदर्शनका क्रममा सुरक्षाबलको गोली एवं ग्रिनेड प्रहारबाट बिहीबारसम्म कम्तीमा ५४ जना मारिएको संयुक्त राष्ट्रसंघको कार्यालयले जनाएको छ ।
बिहीबार 'कू'विरोधी प्रदर्शनका क्रममा मन्डालेमा गोली लागी मारिएकी एक १९ वर्षीय महिलाको दाहसंस्कारमा ठूलो भीड जम्मा भएको बताइएको छ ।
एन्जेल भनेर चिनिने क्याल सिन नाम गरेकी ती युवतीको मृत्युको समयमा लगाएको टी-सर्टमा 'सबै कुरा ठीक हुनेछ' लेखिएको थियो । मानिसहरूले सामाजिक संजालमा उनलाई श्रद्धाञ्जलि दिँदै 'हिरो'को उपमा दिएका छन् ।
प्रदर्शनमा भाग लिँदा हुन सक्ने जोखिमलाई मध्यनजर गर्दै मृतक क्याल सिनले फेसबुकमा आफ्नो रक्त समूहको विवरण लेख्दै उक्त घटनामा उनको मृत्यु भए शरीरका अंगहरू दान दिइदिन अनुरोध गरेकी थिइन् ।
'सबै कुरा ठीक हुनेछ' लेखिएको टी-सर्ट लगाएको ती युवतीको तस्वीर भाइरल भएको थियो ।
मानवअधिकारका लागि संयुक्त राष्ट्र संघीय उच्च आयुक्त मिचेल बाचिलेटले शान्तिपूर्ण प्रदर्शनमाथिको निमर्म दमन बन्द गर्न सेनालाई आह्वान गरेका छन् ।