अमेरिकी अन्तरिक्ष एजेन्सी नासाको पर्सविरन्स रोवरले आफ्नो पाङ्ग्रा निकालेर मंगल ग्रहको सतहमा हिड्न सुरु गरिसकेको जनाइएको छ ।
नासाका अनुसार मंगल ग्रहको भूमध्यरेखा नजिकै जेजेरो नाम दिइएको क्रेटरमा अवतरण गराइएको उक्त रोवर त्यस ग्रहमा जीवनको अवशेषको प्रमाण खोज्ने उद्देश्यले पठाइएको हो ।
मंगलको आगामी १ वर्ष (पृथ्वीको झण्डै २ वर्ष) मा १५ किलोमिटर यात्रा गर्ने त्यस रोवरले अर्बौं वर्षअघि ठूलो ताल रहेको अनुमान गरिएको त्यो क्रेटरमा प्राचीन जीवनको अवशेष पत्ता लगाउन कोसिस गर्ने अपेक्षा गरिएको छ ।
पर्सविरन्सको पहिलो लक्ष्य पृथ्वीबाट लगिएको सानो हेलिकोप्टरको परीक्षण गर्नु रहेको बताइएको छ ।
उक्त रोवरले आगामी केही हप्ता २ किलोग्राम तौल भएको इन्जिन्युटी नाम दिइएको उक्त हेलिकोप्टरलाई राख्ने सुरक्षित स्थानको खोजी गर्नेछ । त्यो हेलिकोप्टर अहिले पर्सविरन्सको पेट (बीचको भाग)को मुनिपट्टि राखिएको छ ।
अत्याधुनिक स्वचालित प्रणाली जडान गरिएका कारण पर्सविरन्स नासाले पठाएका रोवरहरूमध्ये सबैभन्दा छिटो हिँड्ने रोवर हो ।
अगाडिको बाटोका बारेमा पत्ता लगाउन अघिल्ला रोवरहरूले रोकिएर फोटो खिच्नुपर्थ्यो तर पर्सविरन्सले भने हिँड्दा हिँड्दै फोटो खिच्न सक्ने नासाका वैज्ञानिकहरूले उल्लेख गरेका छन् ।
हालसम्मकै उन्नत प्रविधिको प्रयोग भएको पर्सविरन्सको शाब्दिक अर्थ 'हरेक जटिलताका बाबजुद आफ्नो लक्ष्यप्राप्तिका लागि प्रयास गरिरहने' भएकाले त्यो रोवरले अपेक्षित कार्य कूशलतापूर्वक संपन्न गर्नेमा वैज्ञानिकहरू आशावादी छन् ।