सत्ताको नेतृत्व गरिरहेको नेकपा एमालेभित्रको रडाको साम्य हुने छाँटकाट देखिएको छैन । लामो समयदेखिको एमालेको अन्तरकलह सतहमा आएर छताछुल्ल भइसक्दा अब सरकारको अवस्था के हुने र मुलुकको राजनीतिक, सामाजिक, आर्थिक दिशा कता जाने भन्ने अन्योल बढेको छ ।
तत्कालीन माओवादी केन्द्रसँग गरिएको भनिएको 'एकता' टुंगोमा पुग्नै नपाई सर्वोच्च अदालतको फैसलाले 'ए! कता?' बनाइदिएपछि माओवादी केन्द्र र एमाले आआफ्नै साविकका चौतारामा दु:ख बिसाउन आइपुगेका छन् । केपी ओलीको 'शेखी झार्न' घाँटी र आन्द्रा जोड्दै गएका प्रचण्ड, माधव नेपाल, झलनाथ खनाल, घनश्याम भुसाल, भीम रावल, योगेश भट्टराईहरू पनि सर्वोच्चको फैसलापछि 'आआफ्नै चौतारोमा झण्डा र डण्डा उफार्ने' सहमतिसहित ओलीविरुद्धका गतिविधिमा छन् ।
यसबीच हिजो अध्यक्ष केपी ओलीले 'ललिपप'का लागि बोलाएको बैठकबाट तीतो मुख लिएर फर्किएका नेपाल-खनाल खेमाले ओलीविरुद्धका आफ्ना गतिविधि, कार्यक्रम र अभियान जारी राख्ने निर्णय गर्यो । सोही क्रममा ४-५ चैतमा नेपाल-खनाल खेमाले आफ्ना पक्षका नेता, कार्यकर्ताको राष्ट्रिय भेला गर्दै छ ।
उता, आजै अध्यक्ष ओलीले बालिवाटारमा चियापान आयोजना गरेका थिए । उक्त चियापानमा 'पानी बाराबार' शैलीमा असन्तुष्ट नेपाल-खनाल पक्षका कुनै नेता, कार्यकर्ता गएनन् अर्थात् नेपाल-खनाल खेमाले 'ओलीको पानीसमेत नखाने' निर्णय गर्यो, चियापान बहिष्कार गर्यो ।
त्यसपछिलाई के चाहियो पार्टी र सरकार दुवैतिर सत्तामा हालिमुहाली गरेका 'सत्ता नायक' ओलीलाई ! चियापानस्थलबाटै गर्जिए- 'खबरदार मेरा प्यादाहरू हो- मेराविरुद्ध कतै गुटबन्दी गरौला, खेल खेलौला, मलाई सरापौला, मेरा कुर्सीमा आगो लगाउने चेष्टा गरौला ।'
तर, नेपाल-खनाल खेमाले ओलीको गर्जनलाई तिहारमा केटाकेटीले पड्काउने खुर्सानी पटाकाभन्दा ठूलो ठानेनन ।ओलीले आफ्ना आसेपासेलाई, जयजयकार गाउने भक्त-भजनमण्डलीलाई तातो चिया 'सर्भ' गर्दै गर्दा उता सानेपातिर नेपाल-खनाल खेमाले पत्रकार सम्मेलन गरेरै भोलि र पर्सिका लागि तय भएको आफ्नो खेमाको नेता, कार्यकर्ताको भेला गरेर 'देखाइदिने' उद्घोष गर्यो ।
ओलीलाई नेपाल-खनाल खेमाको भोलि र पर्सिको भेला रोक्न निकै सकस परिरहेको त दिउँसो बालुवाटारमा उनको हतास र आतेसपूर्ण बर्बराहटबाटै प्रस्ट भएकै थियो, फेरि रातको ९ बजेतिर आफ्ना महासचिव ईश्वर पोखरेलका नाममा अर्को 'धम्कीपत्र' प्रेषित गरेछन्- नेपाल-खनालका नाममा । उक्त धम्कीपत्रमा सिग्नेचर (हस्ताक्षर) मात्र ईश्वर पोखरेलको छ, बाँकी व्यहोरा त दिउँसै अध्यक्ष ओलीका मुखारबिन्दबाट प्रकट भई जगका धेरै सामु पुगिसकेकै थियो ।
हेर्नुस् धम्कीपत्र: 
