इस्लामिक चरमपन्थीले मोजाम्बिकको उत्तरी क्षेत्रमा अवस्थित पल्मा शहरमा गराएको आतंकवादी आक्रमणमा परी दर्जनौँ मानिसहरूको ज्यान गएको छ भने केही बेपत्ता भएका छन् ।
समुद्री किनारमा पर्ने करिब ७५ हजार जनसंख्या रहेको पल्मा शहरलाई उक्त समूहले कब्जामा लिएको र संंचार सम्पर्क पनि बिच्छेद भएकाले क्षतिको यकिन विवरण आई नसकेको बीबीसीले जनाएको छ ।
बीबीसीका अनुसार पूरै शहरमा शवहरू छरिएका छन् । केही शवहरू टाउको अलग भएको अवस्थामा पनि पाइएका छन् ।
यसबीच धेरै व्यक्तिहरू ज्यान जोगाउन पल्मा शहरबाट भागिरहेका छन् ।
मरिन ट्राफिकको एउटा वेबसाइटलाई उद्धृत गर्दै बीबीसीले जनाएअनुसार पल्मा शहर र पेम्बा बन्दरगाह नजिक धेरै संख्यामा मानिसहरू देखिएका छन् र उनीहरू ज्यान जोगाउन डुंगा चढेर पल्मा छाडिरहेका छन् ।
हतियारधारी समूहले सबैभन्दा पहिले पसल, बैंक र सेनाका क्याम्पहरूमा आक्रमण गरेका थिए । सो आक्रमणबाट जोगिन केही मानिसहरू होटलहरूमा लुकेर बसेका र केही भने केही जंगलतर्फ पनि भागेका बताइएको छ ।
ज्यान जोगाउन भाग्न खोज्नेहरूलाई सुरक्षित तरिकाले उद्धार गर्ने काम भइरहेको जनाइएको छ । समाचार एजेन्सीहरूका अनुसार आइतबार दिउँसो १ हजार ४०० जनालाई उद्धार गरेर एउटा जहाज पल्माबाट २५० किलोमिटर टाढा पेम्बा बन्दरगाह पुगिसकेको छ । उद्धार कार्यमा प्रयोग गरिएका अन्य साना जहाजहरू पनि पेम्बाका लागि प्रस्थान गरिसकेको खबर छ ।
गत बुधबार उक्त क्षेत्रमा इस्लामिक चरमपन्थी आक्रमण भएको थियो । प्रत्यक्षदर्शीलाई उदृत गर्दै बीबीसीले जनाएअनुसार धेरै व्यक्तिहरू आक्रमणबाट जोगिन लुकेर बसेका थिए र सुरक्षाकर्मीहरूको प्रतीक्षा गरिरहेका थिए । ४ दिनदेखि एउटा होटलमा लुकेर बसेका ७ जनालाई भने आक्रमणकारीले मारेका छन् । यसैगरी समुद्री किनारमा केही व्यक्तिहरूको शव टाउको अलग भएको अवस्थामा फेला परेका थिए ।
इस्लामिक स्टेटसँग सम्बन्धित चरमपन्थी समूहले उत्तरी मोजाम्बिकमा सन् २०१७ देखि आक्रमण गर्दै आएको छ । उक्त समूहको आक्रमणबाट हालसम्म २ हजार ५०० जनाको मृत्यु भइसकेको र ७ लाख जना घर छाडेर भाग्न बाध्य भएको बीबीसीले जनाएको छ ।
