प्रि-ओपन सेसनमा नै अलटाइम हाई रेकर्ड बनाएको शेयर बजार परिसूचक नेप्से कारोबार खुल्नासाथ ओरालो लागेर पुनः फर्किएको छ । कारोबार सुरु हुनासाथ २६४५.५० अंकमा पुगेको नेप्से त्यसयता लगातार घटेर २६१७ अंकमा आइपुगेपछि पुन: दिनभर अस्थिर बन्दै २६३१.८९ अंकमा पुगेर बन्द भएको छ ।
बिहीबार उतारचढावका बीच ७ अर्ब २५ करोड ९ लाख २४ हजार रुपैयाँ बराबरको १ करोड ४३ लाख ९० हजार कित्ता शेयर खरिदबिक्री भएको छ । अघिल्लो दिन ६ अर्ब १६ करोड रुपैयाँ बराबरको शेयर खरिदबिक्री भएको थियो ।
इन्डेक्स बढेर हरियाली बनेसँगै सबइन्डेक्समा पनि हरियाली छाएको छ । सबैभन्दा धेरै वित्त समूहको सूचक १.९६ प्रतिशतले बढेको छ भने अन्य ८ वटा समूहको सूचक पनि बढेका छन् । लगानी, म्युचुअल फण्ड, होटल तथा टुरिजम र जीवन बीमा समूहको सूचक भने घटेको छ ।
बिहीबार ७ वटा कम्पनीको शेयर सकारात्मक सर्किट लेभलमा कारोबार भएको छ । आज साञ्जेन जलविद्युत् कम्पनी, युनाइटेड फाइनान्स, किसान माइक्रोफाइनान्स, वोमी लघुवित्त, एनआईसी एसिया लघुवित्त, अजोड इन्स्योरेन्स र श्री इन्भेस्टमेन्ट एण्ड फाइनान्सको शेयर सकारात्मक सर्किट लेभलमा कारोबार भएको हो ।
कारोबार रकमका आधारमा बिहीबार अपर तामाकोसी सर्वाधिक कारोबार हुने कम्पनीमा परेको छ । तामाकोसीको २९ करोड ५६ लाख ३५ हजार रुपैयाँ बराबरको शेयर खरिदबिक्री भएको छ । त्यसैगरी आज एचआईडीसीएल, अपी पावर र नेपाल पुनर्बीमा कम्पनी पनि सर्वाधिक कारोबार हुनेमा परेका छन् ।