एएफसी कप २०२१ प्रारम्भिक चरणअन्तर्गत त्रिभुवन आर्मी क्लब र श्रीलङ्का पुलिसबीच यही २५ चैतमा प्रतिस्पर्धा हुने भएको छ । दशरथ रङ्गशालामा दिउँसो ३ बजे हुने उक्त खेल नकआउटका आधारमा खेलाइने आज यहाँ आयोजित पत्रकार सम्मेलनमा सैनिक शारीरिक तालिम तथा खेलकुद केन्द्रले जानकारी दिएको छ ।

प्रतियोगितामा भाग लिन श्रीलङ्काली टोली २२-२३ चैतमा काठमाडौँ आउने भएको छ । उक्त प्रतियोगिता हेर्नका लागि विशिष्ट श्रेणीका लागि ५०० र साधारणतर्फ ३०० रुपैयाँ शुल्क कायम गरिएको बताइएको छ । प्रतियोगिताको तयारीका लागि आर्मीका खेलाडीलाई बन्द प्रशिक्षणमा राखिएको छ ।

प्रतियोगिताका लागि २० लाख रुपैयाँ खर्च लाग्ने अनुमान गरिएको एन्फाका प्रवक्ता किरण राईले जानकारी दिए ।