आज नेप्सेले उच्च भोल्यूमसहित नयाँ 'अलटाइम हाइ रेकर्ड' बनाएको छ । आज नेप्से परिसूचक २५.७१ अंक बढेर २६५७.६१ विन्दुमा पुगेको हो ।
यो विन्दु हालसम्मकै उच्च बन्द विन्दु हो । यसअघि नेप्सेले गत ९ फागुनमा 'अलटाइम हाइ रेकर्ड' बनाएको थियो । सो दिन नेप्से २६४०.३५ विन्दुमा बन्द भएको थियो ।
नेप्सेको वृद्धिलाई आज कारोबार रकमले पनि साथ दिएको थियो । कारोबार रकमसहितको परिसूचक वृद्धिलाई बलियो वृद्धिको रूपमा लिने गरिन्छ ।
आज सेन्सेटिभ इन्डेक्स ४.३३ अंक बढेको छ भने फ्लोट इन्डेक्स १.७८ अंक र सेन्सेटिभ फ्लोट इन्डेक्स १.३८ अंक बढेको छ । आइतबार नेप्सेमा २१२ वटा कम्पनीको ८९ हजार ८६० पटकको कारोबारमा ९ अर्ब ६८ लाख ५८ हजार रुपैयाँ बराबरको १ करोड ८१ लाख ७३ हजार कित्ता शेयर खरिदबिक्री भएको छ ।
आज ७ वटा कम्पनीको शेयर सकारात्मक सर्किट लेभलमा कारोबार भएको छ । कारोबारमा आएको वोमी माइक्रोफाइनान्स, जनरल इन्स्योरेन्स, राधी विद्युत कम्पनी, आईएमई जनरल इन्स्योरेन्स, एनआईसी एसिया लघुवित्त, सानिमा जनरल इन्स्योरेन्स र साञ्जेन जलविद्युतको शेयर सकारात्मक सर्किट लेभलमा कारोबार भएको हो ।
आज साल्ट ट्रेडिङ कर्पोरेसनको शेयर मूल्य भने सर्वाधिक ४.६३ प्रतिशत घटेको छ । सर्पोट माइक्रोफाइनान्स र एचआईडीसीएलको शेयर मूल्य ४ प्रतिशतभन्दा बढी घटेको छ ।
आइतबार कारोबारमा आएका १३ वटा उपसमूहमध्ये ८ वटा उपसमूहको परिसूचक बढेको छ भने बाँकी ५ वटा उपसमूहको परिसूचक घटेको छ । निर्जीवन बीमा उपसमूहको परिसूचक सर्वाधिक ३.९७ प्रतिशत बढेको छ । त्यसैगरी वित्त उपसमूहको ३.६६ प्रतिशत, अन्यको ३.४१ प्रतिशत र जलविद्युतको १.५ प्रतिशत बढेको छ ।
कारोबारमा आएको व्यापार उपसमूहको परिसूचक आज सर्वाधिक ४.३९ प्रतिशत घटेको छ भने लगानी उपसमूहको २.४६ प्रतिशत घटेको छ ।
कारोबार रकमका आधारमा आज पनि नेपाल इन्फ्रास्ट्रक्चर बैंक लिमिटेड शीर्ष स्थानमा रहेको छ । सो बैंकको यस दिन ४६ करोड ८१ लाख रुपैयाँ बराबरको शेयर खरिदबिक्री भएको छ । त्यसैगरी अपर तामाकोसी, नेपाल पुनर्बीमा कम्पनी, नबिल बैंक, प्रुडेन्सियल इस्न्योरेन्स, नेपाल बैंक र एनएलजी इन्स्योरेन्सको २० करोड रुपैयाँभन्दा बढीको शेयर कारोबार भएको छ ।