सिरहाको लहानमा एक जना व्यवसायीको गोली हानी हत्या गरिएको छ ।

लहान नगरपालिका- २३ गड्डाचोकमा शनिबार मध्यरात सुतिरहेका बेला सुनचाँदी पसले ४५ वर्षीय प्रदीपकुमार विश्वकर्माको हत्या भएको सिरहा प्रहरीले जनाएको छ । 

डकैती गर्न आएको हतियारधारी समूहले गोली प्रहार गर्दा विश्वकर्माको मृत्यु भएको जिल्ला प्रहरी कार्यालय सिरहाले  जानकारी दिएको छ ।

उनीहरूले विश्वकर्माकी श्रीमती अनितालाई पनि धारिलो हतियार प्रहार गरी घाइते बनाएका छन् । अनिताको लहान अस्पतालमा उपचार भइरहेको बताइएको छ । उनको अवस्था सामान्य रहेको प्रहरीले जनाएको छ ।  

घटनामा संलग्न भएको आरोपमा सोही ठाउँका २२ वर्षीय रामकृष्ण चौधरीलाई पक्राउ गरिएको छ । अर्का एक जनालाई पक्राउ गरे पनि प्रहरीले उनको नाम भने खुलाएको छैन ।