मुख्यमन्त्री शाहीले विश्वासको मत लिने

नेकपालाई मान्यता नदिएर साविकका एमाले र माओवादी केन्द्रलाई सर्वोच्च अदालतले ब्युँताइदिएपछिको राजनीतिक जोड-घटाउले कन्द्रदेखि प्रदेशसम्मका सरकार पनि हल्लिएका छन् । प्रदेश १, बाग्मती, लुम्बिनी, गण्डकी र कर्णाली प्रदेशका सरकारमाथि अहिले विश्वासको मतको दबाब परिरहेको छ ।

यसबीच कर्णाली प्रदेशका मुख्यमन्त्री महेन्द्रबहादुर शाहीले कर्णाली प्रदेशसभामा विश्वासको मत लिने प्रयोजनका लागि पत्र दर्ता गरेका छन् । प्रदेशसभा सचिवालयमा उनले हिजो उक्त पत्र दर्ता गराएका हुन् ।

प्रदेशसभा स्रोतका अनुसार ३ वैशाखमा बस्ने प्रदेशसभा बैठकमा मत विभाजन प्रणालीअनुसार विश्वासको मत लिने प्रक्रिया सुरु हुनेछ ।

एमालेले सरकारलाई दिएको समर्थन फिर्ता लिएपछि तत्कालीन माओवादी केन्द्रबाट मुख्यमन्त्री बनेका शाहीको सरकार अल्पमतमा परेको छ । उनलाई प्रतिस्थापन गरेर आफ्नै नेतृत्वमा सरकार निर्माणका लागि एमालेले गृहकार्य गरिरहेको छ ।