सत्तारुढ नेकपा एमालेभित्रको किचलो तथा माओवादी केन्द्र र एमाले अध्यक्ष केपी शर्मा ओलीबीचको टकरावका कारण केन्द्रमा मात्र नभएर प्रदेश सरकारमा समेत धक्का पुगिरहेको छ । केही दिनअघि मात्र कर्णाली प्रदेशका मुख्यमन्त्रीले विश्वासको मत लिएर ढुक्क बनेका छन् ।
प्रदेश सरकारमा अझै अविश्वासको प्रस्ताव आउन थालेका छन् । अविश्वासको प्रस्ताव आउने त्रासले केही दिनअघि गण्डकी प्रदेशसभाको अधिवेशन रातारात अन्त्य गरियो भने हिजो मात्र प्रदेश १ को अधिवेशन पनि अन्त्य गरिएको छ ।
यसबीच आज लुम्बिनी प्रदेशका मुख्यमन्त्री शंकर पोखरेलविरुद्ध अविश्वास प्रस्ताव दर्ता भएको छ ।
कांग्रेस, माओवादी केन्द्र र जसपाको गठबन्धनले सोमबार मुख्यमन्त्री पोखेरलविरुद्ध अविश्वास प्रस्ताव दर्ता गरेका हुन् ।
प्रदेशसभा सचिवालयमा कांग्रेस, माओवादी र जसपाका ४१ जना सांसदको हस्ताक्षरसहित अविश्वास प्रस्ताव दर्ता भएको हो । अविश्वास प्रस्तावमा कांग्रेसका १९, माओवादी केन्द्रका १७ र जसपाका ५ जनाले हस्ताक्षर गरेका छन् । १ सिट रहेको जनमोर्चाले पनि अविश्वास प्रस्तावमा समर्थन जनाए पनि हस्ताक्षर भने गरेको छैन ।
अविश्वास प्रस्ताव दर्तासँगै मुख्यमन्त्रीमा माओवादी केन्द्रका कुलप्रसाद केसी सोनामलाई प्रस्ताव गरिएको छ ।
केसी मुख्यमन्त्री पोखरेलको आन्तरिक मामिला तथा कानुनमन्त्री थिए । अविश्वास प्रस्ताव दर्तासँगै माओवादीले सरकारलाई दिएको समर्थन पनि फिर्ता लिएको छ ।
