सत्तारुढ नेपाल कम्युनिस्ट पार्टी (एमाले)भित्रको 'जुँगाको लडाइँ' झनझन् पेचिलो र जटिल बन्दै गएको छ ।
पार्टी अध्यक्ष केपी शर्मा ओली असन्तुष्ट माधवकुमार नेपाल खेमाका नेता तथा सांसदलाई फटाफट कारबाही गरिरहेका छन् भने माधव खेमा पनि ओलीविरोधी गतिविधि तीब्र बनाइरहेको छ ।
अहिले एमालेमा भइरहेको रमिता हेर्नलायक बनेको छ तर देश र जनताका लागि भने घातमाथि घात भइरहेको टिप्पणी जनस्तरबाट नै हुन थालेको छ ।
यसैबीच केही केन्द्रीय नेता तथा प्रदेश सांसदलाई आफ्नोविरुद्ध लागेको झोँकमा कारबाही गरेका अध्यक्ष ओलीले आज पुनः संघीय संसदका २७ जना सांसदलाई स्पष्टीकरण सोधेका छन् ।
ओलीका पछिल्ला कदमले आफ्नाविरोधीलाई हरहालतमा पार्टीबाट पाखा लगाउने र पार्टीमा आफ्नो बर्चस्व कायम गर्ने नियत प्रस्ट पारेको छ ।
ओलीका एकपछि अर्का आफ्नो खेमाविरोधी 'एक्सन'को प्रतिकारका लागि रणनीति बनाउन नेकपा एमालेका नेता माधवकुमार नेपाल खेमाले आफू पक्षधर सांसदहरूको बैठक बोलाएको छ ।
बैठक आजै बानेश्वरस्थित अर्याल होटलमा बस्दै छ ।
अध्यक्ष ओलीले पार्टीको नाम र चिह्न दुरूपयोग गरेर समानान्तर गतिविधि गरेको भन्दै नेपालसहित प्रतिनिधिसभाका २७ र कर्णाली प्रदेशका ५ सांसद गरी ३२ सांसदलाई स्पष्टीकरण सोधेका छन् ।
माधव खेमाले ओलीविरोधी गतिविधि जारी राखेको छ भने ओलीले माधव खेमामाथि स्पष्टीकरण/कारबाहीका प्रहार पनि गरिरहेका छन् । एमालेको यो किचलोले देश र जनतालाई कति नोक्सानि गरेको छ भन्ने लेखाजोखा आमजनले गरिरहेका सर्वसाधारणको मत सार्वजनिक हुन थालेको छ तर एमाले नेतृत्वलाई यसबारे कुनै चिन्ता र चासो देखिँदैन ।
