राजनीतिक अस्थिरता र अन्योल बढिरहेका बेला सत्तारुढ दलभित्रकै किचलो, सत्ता साझेदार नेपाल कम्युनिस्ट पार्टी (माओवादी केन्द्र)को असमर्थन र असहयोग, प्रमुख प्रतिपक्ष नेपाली कांग्रेसको रहस्यमय मौनताले सिर्जित थप समस्याले अबको राजनीतिक 'कोर्स' कता जान्छ, भन्न सकिने अवस्था छैन ।

यसैबीच एमसीसी पासको लफडाले प्रधानमन्त्री केपी शर्मा ओली र सभामुख अग्निप्रसाद सापकोटाबीचको द्वन्द्व सतहमा आएको छ । प्रधानमन्त्री ओली पछिल्लो समय सभामुख सापकोटाप्रति निकै आक्रामक र आक्रोशित बन्दै 'अनैतिक' र 'अराजक' भएको आरोप लगाइरहेका छन् ।

उता, सभामुख अग्निप्रसाद सापकोटाविरुद्ध परेको मुद्दामा आज सर्वोच्च अदालतमा सुनुवाइ हुने भएको छ ।

सर्वोच्च अदालतको संवैधानिक इजलासमा सुनुवाइ हुने गरी आजको पेसीमा चढेको छ । गत २३ माघमा संवैधानिक इजलासमा पेसी चढे पनि यो मुद्दामा 'हेर्न नभ्याइने'मा परेको थियो ।

यस मुद्दामा सर्वोच्चले कस्तो निर्णय गर्छ, त्यस आधारमा सभामुखको समग्र राजनीतिक भविष्य तय हुनेछ ।