रोयल च्यालेन्जर्स बेङ्लोरले इन्डियन प्रिमियर लिग (आईपीएल)मा राजस्थान रोयल्सलाई १० विकेटले पराजित गरेको छ ।

ओपनरद्वय देवदत्त पाडिक्कल र कप्तान विराट कोहलीले अविजित शतकीय साझेदारी गरेपछि बेङ्लोरले १७८ रनको लक्ष्य १६.३ ओभर खेल्दै बिनाक्षति १८१ रन बनाएर जीत हात पारेको हो ।

पाडिक्कलले ५२ बल खेल्दै ११ चौका र ६ छक्का मद्धतमा अविजित १०२ रन बनाए । आईपीएलमा उनको यो पहिलो शतक हो ।

यस्तै, कोहलीले ४७ बल खेल्दै ६ चौका र ३ छक्का मद्धतमा अविजित ७२ रन जोडे ।

त्यसअघि मुम्बईस्थित वाङखडे स्टेडियममा टस हारेर पहिले ब्याटिङ गरेको राजस्थानले निर्धारित २० ओभरमा ९ विकेट गुमाएर १७७ रन बनाएको थियो । राजस्थानका लागि शिभम दुबेले सर्वाधिक ४६ रन बनाए । राहुल तेवाटियाले ४० रन जोडे । रियान परागे २५ र कप्तान सन्जु सामसनले २१ रन बनाए ।

बलिङमा बेङ्लोरका मोहम्मद सिराज र हर्सल पटेलले ३-३ विकेट लिए । केल जेमिसन, केन रिचर्डसन र वासिङ्टन सुन्दरले समान १ विकेट लिए ।

लगातार चौथो जीतपछि ८ अंक जोडेको बेङ्लोर फेरि शीर्ष स्थानमा उक्लेको छ । यस सिजन बेङ्लोर अपराजित एक्लो टोली हो । 

४ खेल खेल्दा तेस्रो हार बेहोरेको राजस्थान २ अंकसहित तालिकाको पुछारमा झरेको छ ।