एमाले बैठक आज: के गर्ला माधव खेमाका सांसदको स्पष्टीकरणबारे ?
नेपाल कम्युनिस्ट पार्टी (एमाले)को विवाद र मतभेद जारी रहेकै बेला आज महाधिवेशन आयोजक समितिको बैठक बस्दै छ । आज विहान ११ बजे प्रधानमन्त्री निवास बालुवाटारमा बैठक बस्न लागेको हो ।
संस्थापन अध्यक्ष केपी शर्मा ओली खेमाले असन्तुष्ट माधव नेपाल खेमाका नेतालाई स्पष्टीकरण सोध्ने र माधव खेमा समानान्तर गतिविधि गरिरहने 'खेल' खेलिरहेका छन् । नेपाल खेमाका नेतालाई कारबाही गरेर ओलीले केही समयअघि आफ्नो खेमाका नेताको मात्र केन्द्रीय कमिटीलाई महाधिवेशन आयोजक कमिटीमा परिणत गरेका थिए ।
आजको बैठक ६ वैशाखकै बैठकको निरन्तरता हो । ६ गतेको बैठकले माधव नेपाल पक्षका २७ जना संघीय सांसद र कर्णाली प्रदेशसभाका ५ जना सांसदलाई स्पष्टीकरण सोध्ने निर्णय गरेको थियो । सोहीअनुसार उनीहरूमाथि स्पष्टीकरण पनि सोधिइसकेको छ । केहीले ओलीको प्रतिकारसहित कडा प्रश्न गर्दै जबाफ दिइसकेका छन् ।
आजको बैठकमा सोही स्पष्टीकरणका बारेमा पनि छलफल हुने बताइएको छ । बैठकले स्पष्टीकरण सोधिएका नेताहरूका जबाफबारे कस्तो निर्णय लिनेछ भनेर आमचासो बनेको छ ।
स्पष्टीकरण सोधिएपछि अध्यक्ष ओली र माधव नेपालबीच बुधबार र बिहीबार २ पटक भेट वार्ता भसकेका छन् । तर, उक्त भेट वार्ता चिया-चमेना गर्ने र धरहरा हेर्नेभन्दा बढी उपलब्धिमूलक हुन नसकेको माधव खेमाले बताउँदै आएको छ ।
