नेपाल कम्युनिस्ट पार्टी (एमाले)का अध्यक्ष केपी शर्मा ओलीले मुलुकमा वैकल्पिक सरकार गठनको संभावना नदेखिएको भन्दै आफ्ना नेता, कार्यकर्तालाई निर्वाचनका लागि तयार रहन भनेका छन् ।
आज सुरु भएको महाधिवेशन आयोजक कमिटीको बैठकमा राजनीतिक प्रतिवेदन पेस गर्दै एमाले अध्यक्षसमेत रहेका प्रधानमन्त्री ओलीले मुलुक ताजा जनादेश अर्थात् निर्वाचनतर्फ उन्मुख भएको बताएका हुन् ।
प्रतिनिधिसभाले सरकारलाई काम गर्ने वातावरण नदिएकाले र वैकल्पिक सरकारसमेत निर्माण गर्न नसक्ने गरी अकर्मण्यतामा फसेकाले मुलुक त्यसतर्फ अघि बढेको ओलीको बुझाइ छ । सत्ता टिकाउन आफूले अलोकतान्त्रिक र असंवैधानिक गतिविधि नगर्ने पनि उनले उल्लेख गरेका छन् ।
प्रतिनिधिसभा विघटन गर्ने विगतको आफ्नो निर्णयको बचाउ गर्दै ओलीले त्यसको औचित्य समय क्रममा थप पुष्टि हुँदै आएको दाबी गरेका छन् । 'यति हुँदाहुँदै पनि, हाम्रो पार्टी सविधानको सर्वोच्चता, विधिको शासन, शक्ति पृथकीकरणको सिद्धान्त एवं स्वतन्त्र न्यायपालिकामा विश्वास गर्ने पार्टी हुनाले आफ्ना कतिपय पृथक विश्लेषण र तर्क हुँदाहुँदै पनि अदालतको उक्त फैसलालाई कार्यान्वयन गर्ने निर्णय गरेको छ’, प्रतिवेदनमा भनिएको छ ।
प्रतिवेदनमा अध्यक्ष ओलीले नेता माधव नेपालप्रति आक्रोश व्यक्त गरेका छन् । पार्टी नेतृत्वलाई कमजोर बनाएर प्रचण्डको अस्वाभाविक महत्त्वाकांक्षालाई मलजल नेता नेपालले गरेको उनको आरोप छ ।
सही विचार, सही धार र नेतृत्वलाई समाप्त पार्ने योजनाअनुरूप प्रतिक्रियावादी शक्तिहरूसँगको साँठगाँठमा रहेका नेताहरूलाई कारबाही गर्दै आएको प्रतिवदनमा उल्लेख गरेका छन् ।
केही नेताहरूका निहित स्वार्थ, गुटगत क्रियाकलाप र विभाजनकारी गतिविधिका कारण पार्टी मात्र नभई देश नै संकटमा फसेको उनले बताएका छन् ।
२०७८ मंसिरमा पार्टीको दशौँ राष्ट्रिय महाधिवेशनको निर्णय भएको भन्दै समयमै पार्टी सदस्यता नवीकरण, र टोल र प्रारम्भिक कमिटीदेखि नै अधिवेशन सम्पन्न गर्दै पार्टीलाई नयाँ जिम्मेवारीका साथ अघि बढाउने योजना ओलीले अघि सारेका छन् ।
प्रारम्भिक कार्यतालिकाअनुसार ५ भदौ २०७८ मा वडा अधिवेशन, १५ भदौमा पालिका अधिवेशन, ३० भदौमा जिल्ला अधिवेशन, २३ असोजमा २३ अधिवेशन गर्ने तय भएको छ ।
आजको बैठकमा माधव नेपाल खेमाका सांसदहरूले दिएको स्पष्टीकरणबारे पनि छलफल र निर्णय हुने बताइएको छ ।