जनता समाजवादी पार्टीको निर्णय पर्खिएर बसेको कांग्रेसले प्रधानमन्त्रीविरुद्ध अविश्वास प्रस्ताव दर्ताको कदम नचाल्ने भएको छ । आफ्नो पक्षका सांसदहरूको हस्ताक्षर संकलन गरिसकेको कांग्रेसले जसपाले निर्णय दिएको भए बुधबार प्रधानमन्त्री ओलीविरुद्ध अविश्वासको प्रस्ताव दर्ता गर्ने तयारी गरेको थियो ।

तर, जसपाका अध्यक्ष उपेन्द्र यादवले जसपाको संसदीय दलको विधान नभएको र कार्यकारिणी समितिको बहुमतले ओलीविरुद्ध उभिने निर्णय गर्ने कांग्रेस सभापति शेरबहादुर देउवालाई वचन दिएका थिए ।

जसपाको बैठक मंगलबार बस्न नसकेपछि प्रधानमन्त्रीविरुद्धको अविश्वास प्रस्ताव आज बुधबार आउन नसक्ने भएको हो ।

मंगलबार बिहान बालकुमारीस्थित पार्टी कार्यालयमा शीर्ष नेताहरू जुटेका थिए । बिहान ९ बजे महन्थ ठाकुर, उपेन्द्र यादव, डा. बाबुराम भट्टराई, राजेन्द्र महतो, अशोक राई र राजेन्द्र श्रेष्ठ छलफलका लागि बसेका थिए । तर, उनीहरूबीच बैठक र बैठकका एजेण्डामाथि सामान्य छलफलमै सकिएको थियो ।

जसपाको २ धारमा सहमति जुट्न नसक्दा ५ चैतमा निर्धारित कार्यकारिणी समितिको बैठक पनि रोकिएको थियो । सत्ता समीकरणका विषयमा पनि जसपामा २ धार अलगअलग मान्यतामा रहँदै आएका छन् । महन्थ ठाकुर र राजेन्द्र महतो ओलीलाई नै साथ दिने मुडमा छन् भने भट्टराई र यादव ओलीलाई साथ नदिने पक्षमा देखिएका छन् ।