बुधबार गण्डकी प्रदेशका मुख्यमन्त्री पृथ्वीसुब्बा गुरुङमाथिको अविश्वास प्रस्तावमा मतदान हुने थियो । अचानक एक जना सांसद 'बेपत्ता' भए । राष्ट्रिय जनमोर्चाले आफ्ना सांसद नभेटिउन्जेल संसदका कारबाही रोक्न भन्यो । सभामुखले सहजै संसद स्थगन गरिदिए ।
पछि थाहा भयो- गण्डकी प्रदेशका जनमोर्चाबाट निर्वाचित सांसद खिमविक्रम शाही पोखराकै एउटा निजी अस्पतालमा 'कोरोना संक्रमित' भएर उपचार गराइरहेका रहेछन्, जुन कुरा 'कसैलाई थाहा थिएन ।'
रमाइलो त के भने, सबै सांसदको पीसीआर जाँच गर्दा उनको पनि नेगेटिभ आएको थियो सरकारी प्रयोगशालामा तर सोही दिन निजी प्रयोगशालामा जाँच्दा पोजिटिभ आएछ उनको रिपोर्ट । अनि 'हतारहतार' संसद बैठक माया मारेर 'ज्यान बचाउन' उनी निजी अस्पतालतिर दौडिएछन् ।
उनी अस्पतालमा 'सिकिस्तझैँ' भएर उपचार गराइरहेका 'थाहा पाउनेबित्तिकै' मुख्यमन्त्री गुरुङ उनलाई भेट्न अस्पताल पुगे ।
यसरी मुख्यमन्त्री गुरुङको पद नाटकीय ढंगले केही समयलाई जोगियो ।
तर, सांसद शाहीलाई अस्पतालमा बन्दीको रूपमा राखिएको भन्दै उनको स्थिति सार्वजनिक गर्न जनमोर्चाले सरकारसँग अनुरोध गरेको छ । राष्ट्रिय जनमोर्चाले मतदानको बेलामा भएको शाहीको अनुपस्थितिलाई रहस्यमय पनि भनेको छ ।
‘राष्ट्रिय जनमोर्चाका जिम्मेवार केन्द्रीय नेता तथा गण्डकी प्रदेशका सांसदहरू जाँदा पनि उहाँलाई भेट गर्न दिइएको छैन । उहाँलाई एक प्रकारको बन्दीका रुपमा किन राखियो र त्यसको कारण के हो ?’, राष्ट्रिय जनमोर्चाकी प्रवक्ता दुर्गा पौडेलले बिहीबार विज्ञप्ति जारी गर्दै भनेकी छन्, ‘उहाँको स्थिति सार्वजनिक गर्नका लागि सरकारसित अनुरोध गर्दछौँ ।’
विश्लेषकहरूले भने गण्डकी प्रदेशको हिजोको 'खेल' संसदीय परंपराकै भद्दा मजाक र कुरूप खेल भन्दै आएका छन् ।
