स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ९ हजार १९६ जनामा कोरोना भाइरस संक्रमण पुष्टि भएको छ । उक्त अवधिमा १९ हजार ९८७ पीसीआर परीक्षणमा ९ हजार २३ र ४९५ एन्टिजेन परीक्षणमा ७३ जनामा संक्रमण पुष्टि भएको थियो ।
सोही अवधिमा काठमाडौं उपत्यकामा ४ हजार १०० जनामा कोरोना संक्रमण पुष्टि भएको छ, जसमध्ये ३ हजार ८९ काठमाडौँका, ३७४ भक्तपुरका र ६४३ ललितपुरका रहेका छन् ।
त्यसरी नै पछिल्लो २४ घन्टामा ५० जनाको मृत्यु भएको छ भने २ हजार ९०५ जनामा संक्रमणमुक्त भएका छन् ।
यस्तै शुक्रबारसम्म नेपालमा कोरोना भाइरसबाट सक्रिय संक्रमितको संख्या ७८ हजार ६२९ पुगेको छ । संक्रमितमध्ये ७२८ जना आईसीयूमा र २३१ जना भेन्टिलेटरमा उपचाररत छन् ।
कोरोना भाइरसको संक्रमणबाट मृत्यु हुनेको संख्या हालसम्म ३ हजार ५७९ पुगेको छ ।
कोरोना महामारीले मुलुकलाई नै आक्रान्त तुल्याएको छ । सक्रिय संक्रमितको संख्या मुलुकका स्वास्थ संस्थाहरूले धान्न नसक्ने अवस्थामा पुगिसकेको छ । यस्तो परिस्थितिमा महामारी रोकथाममा ध्यान केन्द्रित गर्नुको सट्टा नेपाल सरकार र अन्य मुख्य राजनीतिक दलहरू सत्ता जोगाउने र हत्त्याउने लडाइँ गर्नमा व्यस्त छन् ।
यसैबीच स्वास्थ्य तथा जनसंख्या मन्त्रालयले सेराम इन्स्टिच्युटसँग ५० लाख खोप खरिद हाललाई 'सम्भव नभएको' बताएको छ ।
मन्त्रालयका प्रवक्ता डा. जागेश्वर गौतमले शुक्रबार जारी गरेको विज्ञप्ति अनुसार नेपालले खरिद गरेर आउन बाँकी १० लाख डोज आपूर्तिलाई मात्र प्राथमिकतामा राखेको जानकारी सेरमले दिएको बताइएको छ ।
