नेकपा (एमाले) को माधवकुमार नेपाल-झलनाथ खनाल खेमाको सांसदहरूको बैठकले मतदानका लागि संसदमा अनुपस्थित हुने निर्णय गरेको छ । स्रोतका अनुसार सोमबार बिहान सिंहदरबारमा बसेको बैठकले यस्तो निर्णय गरेको हो ।

सांसदहरूले अनुपस्थित हुने कि राजीनामा दिने भन्नेबारे अहिले बस्ने स्थायी कमिटीको बैठकले अन्तिम निर्णय गर्ने बताइएको छ ।

प्रधानमन्त्री ओलीले दिउँसो १ बजे बस्ने प्रतिनिधिसभा बैठकबाट विश्वासको मत लिँदैछन् । यसअघि आइतबार नेता नेपालले ओलीलाई ६ बुँदे मागसहित दिएको अल्टिमेटमको समय आज बिहान ९:०० बजे सकिएको थियो । उक्त समयसीमाभित्र अध्यक्ष ओलीबाट उचित पहल नभएपछि नेपाल-खनाल खेमाका सांसदहरूको बैठक बसेर उल्लेखित निर्णय गरेको हो ।