नेकपा (एमाले) का अध्यक्ष एवं प्रधानमन्त्री  केपी शर्मा ओली र एमालेका बरिष्ठ नेता माधवकुमार नेपाल बीच टेलिफोनमा कुराकानी भएको छ । कुराकानीका क्रममा अध्यक्ष ओलीले नेता नेपाललाई भेटवार्ताको प्रस्ताव राखेको बताइएको छ ।

केहीबेर अघि बालुवाटारमा बसेको स्थायी कमिटी बैठकले नेता नेपाल सहित भीम रावल, घनश्याम भूसाल र सुरेन्द्र पाण्डेलाई गरिएको कारबाही फिर्ता लिने निर्णय गरेको थियो । 

उक्त बैठकले अध्यक्ष ओलीलाई नेता नेपालसँग सम्वाद र सहमति गर्ने थप अधिकार दिएको जनाइएको छ । 
२७ वैशाखमा प्रधानमन्त्री ओलीले विश्वासको मत लिन लाग्दा नेता नेपाल खेमाका सांसदहरू अनुपस्थित भएका थिए । प्रधानमन्त्रीले विश्वासको मत लिन असफल भएपछि  लगत्तै  राष्ट्रपति विद्यादेवि भण्डारीले संविधानको धारा ७६ (२) अनुसार दुई वा दुई भन्दा बढी दलहरुको संयुक्त सरकारका लागि आव्हान गर्दै आज राति ९ बजे सम्मको समय दिएकी थिइन् । 

राष्ट्रपतिले दिएको समयसीमा सकिनुअघि हुदैगरेका एमालेभित्रका गतिविधिहरूले उक्त पार्टीको एकतातर्फ संकेत गरेको जानकारहरू बताउँछन्  ।