नेप्सेले बनायो अल टाइम हाई रेकर्ड, कारोबार रकम ११ अर्बमाथि
साताको तेस्रो दिन शेयर बजारमा नेप्से परिसूचक तथा कारोबार रकमले नयाँ रेकर्ड राख्दै आजसम्मकै नयाँ इतिहास रचेको छ । यस दिन नेप्से परिसूचक ३४ अंकले वृद्धि भई २७९३.९० को विन्दुमा पुगेको छ भने ११ अर्ब ३५ करोड ९३ लाख ६० हजार ९१.९६ रुपैयाँ बराबरको कारोबार भएको छ ।
यस दिन बजारमा २१५ वटा कम्पनीको २ करोड ३१ लाख ३१ हजार ६१५ कित्ता शेयर कारोबार भयो । सबैभन्दा बढी करोबार हुनेमा पुनर्बीमा कम्पनी लिमिटेड रहेको छ । यस कम्पनीको ६७ करोड रुपैयाँभन्दा बढी कारोबार भएको छ । नेसनल लाइफ इन्स्योरेन्स लिमिटेड, अरुण काबेली पावर कम्पनी कारोबारका हिसाबले दोस्रो र तेस्रो स्थानमा रहे । नेसनल लाइफ इन्स्योरेन्सको ३१ करोड ५६ लाख र अरुण काबेली पावरको ३१ करोड ४३ लाख रुपैयाँ बराबरको कारोबार भएको छ ।
यस दिन १३ उपसूचकमध्ये १२ उपसूचकको सूचकमा हरियाली छाएको छ भने उत्पादनमूलक उपसमूहमा ज्यादै झिनो अंकले गिरावट आएको छ । विशेषत: होटल फाइनान्स हाइड्रोपावर र विकास बैंकमा लगानीकर्ताको आकर्षण रहेको देखिन्छ । यस दिन ११ वटा कम्पनीको शेयरमूल्य १० प्रतिशतले बढेको छ भने २३ वटा कम्पनीको शेयर मूल्य ९ प्रतिशतभन्दा धेरैले बढेको छ ।
९० प्रतिशतभन्दा बढीले अनलाइनमार्फत कारोबार गर्नु, नयाँ लगानीकर्ताको प्रवेश, लकडाउनका कारण अन्य क्षेत्रमा लगानीको वातारण नहुनु, बैंकको व्याजदर कम हुनु जस्ता कारणले शेयर बजार वृद्धि भएको विज्ञहरू बताउँछन् ।
