लमजुङमा गएको भूकम्पबाट २४१ घरमा क्षति, परकम्प जारी
लमजुङको भुलभुलेलाई केन्द्रबिन्दु बनाएर हिजो बिहान गएको भूकम्पको बिगत २४ घण्टामा ८६ पटक परकम्प महसुस गरिएको बताइएको छ ।
बुधबार बिहान ५ बजेर ४२ मिनेटमा ५ दशमलव ८ म्याग्निच्युटको भूकम्प गएको थियो ।
पहिलोपटकको भूकम्प गएयता चार म्याग्नेच्युटमाथिका ६ वटा र सोभन्दा कमका ८२ वटा धक्का महसुस गरिएको राष्ट्रिय भूकम्प मापन तथा अनुसन्धान केन्द्रले जनाएको छ ।
प्रहरीका अनुसार अहिलेसम्म भूकम्पका कारण २४१ घरमा क्षति पुगेको छ । जसमध्ये ५० घर पूर्ण रुपमा भत्किएका छन् भने बाँकी घरपनि अहिलेकै अवस्थामा बस्न नमिल्ने अवस्थामा रहेको बताएको छ ।
भूकम्पसँगै भएको बर्षाले जनजिवन अझ अस्तव्यस्त बनाएको र बर्षा कमभएसँगै क्षतिपुगेका परिवारलाई त्रिपाल लगायत राहत सामाग्री उपलब्ध गराउने तयारी रहेको प्रहरीले जनाएको छ ।
कोरोना महामारीलका कारण निषेधाज्ञा झेलिरहेका लम्जुङवासीहरू भूकम्पको त्रासका कारण रातिको समयमा समेत घरभित्र बस्न सक्ने अवस्था नरहेको बताइएको छ ।
यसैबीच भूकम्प मापन तथा अनुसन्धान केन्द्रले समेत भूकम्पको धक्का अब रोकिन सक्छ वा अझै ठूलो आउन सक्छ भनेर यकिनका साथ भन्न सक्ने अवस्था नभएको जानकारी गराउदै सतर्क रहन आग्रह गरेको छ ।
