आइतबार शेयर बजारको परिसूचक र कारोबार रकम दुवैमा नयाँ रेकर्ड बनेको छ ।
आज नेप्से परिसूचक अहिलेसम्मकै उच्च अंकमा पुगेर नयाँ रेकर्ड बनेको हो । आइतबार १२.६ अंकले बढेर नेप्से २८२८ अंकमा कायम भएको छ । यो अंक अहिलेसम्मकै उच्च हो ।
एकै दिन १७ अर्ब २ करोड रुपैयाँको शेयर किनबेच भएर कारोबार रकममा पनि अर्को रेकर्ड बनेको छ । एकै दिन यति धेरै रकमको कारोबार भएको पहिलो पटक हो । यसअघि १४ अर्ब ७६ करोड रुपैयाँको कारोबार भएको रेकर्ड छ ।
यस दिन बैंकिङ १९, होटल तथा पर्यटन १३५, विकास बैंक २५५, फाइनान्स ८३, निर्जीवन बीमा ६४, जीवन बीमा ९६ अंकले बढेका छन् ।
ब्यापार ३२, उत्पादन ५, अन्य ५४, माइक्रोफाइनान्स ७४ अंकले घटे । जलविद्युत र लगानी समूह भने १ अंकमुनि रातो रहे।
आज ज्योति विकास बैंकको मूल्य १० प्रतिशतले बढ्यो भने घलेम्दी, आँखुखोला हाइड्रो, गुडविल फाइनान्स, लुम्बिनी विकास बैंक, साइन रेसुङ्गा, सोल्टी होटल, ओरियन्टल होटल, खानीखोला हाइड्रो, सिन्धु विकास बैंक, जोशी, दिव्यश्वरी हाइड्रो, संग्रिला डेभलपमेन्टको मूल्य साढे ९ प्रतिशतदेखि १० प्रतिशतसम्म बढ्यो । समृद्धि फाइनान्स, रिलायन्स फाइनान्स र युनियन हाइड्रोको मूल्य ९ प्रतिशतले बढ्यो ।
बरुण हाइड्रो र हिमालय ऊर्जा विकासको मूल्य सबैभन्दा धेरै ६ प्रतिशतले घटेको छ । यस दिन कारोबारका आधारमा नेसनल हाइड्रोपावर, अरुण काबेली, युनाइटेड मोदी, बुटवल पावर कम्पनी र अपि पावर अगाडि रहे ।