जाबेर अल-अहमद अन्तर्राष्ट्रिय रंगशालामा सोमबार भएको विश्वकप 2022 र एसियन कप 2023 को छनौट खेलमा नेपाल जोर्डनसँग 0-३ गोलअन्तरले पराजित भयो ।

जोर्डनले बाह फैजल सैफको पेनाल्टी गोलमा २४औं मिनेटमा अग्रता लियो । यसअघि  जोर्डनका मोहमद सुलेमनले १४औं मिनेटमा पेनाल्टी क्षेत्रबाहिरैबाट सशक्त रूपमा प्रहार गरेको बललाई गोलकिपर किरण चेम्जोङले पञ्च गर्दै मुस्किलले बचाएका थिए ।  डिफेन्डर रोहित चन्दले पेनाल्टी क्षेत्रमा सुलेमनलाई फाउल गर्दै लडाएपछि जोर्डनले पेनाल्टीमार्फत गोल गर्ने मौका पाएको थियो ।

फैजलले नै ४२औं मिनेटमा पाएको फ्रिकिकमा करिब ३० यार्डबाट प्रहार गरेको बल उत्कृष्ट गोलमा परिणत भएपछि जोर्डनले २-० को अग्रता लिएको थियो ।

खेलको ६७अौ मिनेटमा तेस्रो गोल यजन अल अरबले गरेपछि जोर्डनले ३-० को अग्रता लिएको थियो ।

नेपालका गोलकिपर किरणले सुलेमनले ४२अौं मिनेटमा नजिकै बाट प्रहार गरेको बलको उत्कृष्ट बचाउ गरेका थिए ।

जोर्डनबिरूद्दको खेलमा प्रशिक्षक अब्दुल्लाहले ताइपेईविरुद्ध खेलेको पहिलो रोजाइमा तीन खेलाडी परिवर्तन गर्दै जोर्डनविरुद्ध नेपाली टिमलाई उतारेका थिए । उनले फरवार्ड आशिष लामााको स्थानमा अभिषेक रिजाललाई अवसर दिए । मिडफिल्डर सुनिल बल र राइटब्याक गौतम श्रेष्ठलाई बेन्च मा राख्दै डिफेन्डरद्वय दिनेश राजवंशी र विकास खवास ल्याएका थिए ।

छनोटमा पाँचौं हारसँगै नेपालको विश्वकप 2022  छनोटको तेस्रो चरणमा प्रवेश गर्ने औपचारिक रूपमा सम्भावना समाप्त भएको छ । त्यस्तै एसियन कप २०२३ छनोटको तेस्रो चरणमा पुग्न पनि समूहमा चौथो हुनेमध्ये उत्कृष्ट चारमा रहनुपर्छ । जोर्डनविरुद्धको हारले यसमा पनि नेपालको सम्भावना गणितीय रूपमा मात्रै बाँकी रहेको छ। चौथो हुनेमध्ये उत्कृष्ट चारमा पर्न नसके नेपालले पुछारका ११ टिममा रहेर एसियन कप छनोटको तेस्रो चरणमा पुग्न प्लेअफ खेल्नुपर्नेछ ।

दोस्रो चरणको छनोटको अन्तिम खेलमा नेपालले शुक्रबार अस्ट्रेलियासँग खेल्नेछ ।  जोर्डन चौथो जितपछि कुवेतलाई तीन अंकले उछिन्दै दोस्रो स्थानमा उक्लिएको छ भने शतप्रतिशत जितसहित अस्ट्रेलिया (१५) शीर्षस्थानमा छ । नेपालले हालसम्म मात्र (६) अंक जोडेको छ ।