कांग्रेस सभापति शेरबहादुर देउवाले आगामी भदौभित्रै पार्टीको १४औँ महाधिवेशन गर्नुपर्नेमा प्रतिबद्ध रहेको बताएका छन् ।
पार्टीको महाधिवेशन र समसामयिक राजनीतिक विषयमा छलफल गर्न देउवा निवास बूढानीलकण्ठ पुगेका कंग्रेसका युवा नेताहरूसँग देउवाले यस्तो बताएका हुन् । अरू समय थप्ने सुविधा नभएकाले भदौभित्रै अधिवशन गर्नुपर्ने देउवाको भनाइ थियो । तर, कोरोनाको प्रकोपका कारण अप्ठ्यारो भएको देउवाले ती युवानेतासँग बताएका थिए ।
देउवाले महाधिवेशनका विषयमा केही दिनभित्रै पदाधिकारी बैठक बोलाएर छलफल गर्ने बताएका भेटमा सहभागी एक युवानेताले जानकारी दिए ।
युवा नेताहरूले पार्टीको महाधिवेशन साझा दायित्व भएको भन्दै पार्टीमा छलफल गरेर कार्यतालिकामा आवश्यक परिमार्जन गर्न र महामारीका बीच महाधिवेशन गर्ने वैकल्पिक उपायबारे छलफल गर्न आग्रह गरेका छन् । नेताहरूले क्रियाशील सदस्यता छानबिन समितिलाई सक्रिय बनाउन पनि भनेका छन् ।
कांग्रेसले यस पटक अनलाइनमार्फत क्रियाशील सदस्यता नवीकरण र नयाँ सदस्यताको विवरण संकलन गरेको छ । अहिलेसम्म ८ लाखभन्दा बढी सदस्यको विवरण प्राप्त भएको बताइएको छ । समितिले अन्तिम पटक मौका स्वरूप जिल्ला र क्षेत्रीय समितिहरूलाई मंगलबार राती १२ बजेभित्र क्रियाशील सदस्यताको विवरण अपडेट गरिसक्ने म्याद दिएको छ ।
तर, प्राप्त विवरणमाथि छानबिनको काम सुरु भएको छैन, जबकि क्रियाशीलको विवादकै कारण पार्टीको महाधिवेशन प्रभावित हुँदै आएको छ ।
यस पटक त्यसको करिब दोब्बर क्रियाशील सदस्य छन्, तर त्यसमाथि छानविनका लागि समय छैन । अहिलेको रमेश लेखक नेतृत्वको छानबिन समितिले क्रियाशील छानबिनका लागि थोरैमा पनि १ महिना लाग्ने अनुमान गरिरहेको छ । यसअघि निर्धारित कार्यतालिकाअनुसार १७ जेठभित्र छानबिन समितिले क्रियाशील छानबिन गरी केन्द्रीय समितिलाई बुझाइसक्नुपर्ने थियो ।
पार्टीको महाधिवेशन र अन्य राजनीतिक विषयमा छलफलका लागि कांग्रेसका युवा नेताहरू चन्द्र भण्डारी, धनराज गुरुङ, गुरुराज घिमिरे, गगन थापा, जीवन परियार, बद्री पाण्डे, प्रदीप पौडेललगायत नेताहरू मंगलबार बिहान देउवा निवासमा पुगेका थिए ।
पूर्वनिर्धारित कार्यतालिकाअनुसार वडा तहको अधिवेशनको मिति आउन अब १० दिन मात्रै बाँकी छ । ५ असारमा वडा र ७ असारमा पालिकास्तरको अधिवेशन गर्ने कांग्रेसको कार्यतालिका छ । यो मितिमा अब महाधिवेशन नहुने निश्चित भइसकेको छ ।
सभापति देउवासमक्ष युवा नेताहरूले वडा र स्थानीय तहस्तरको अधिवेशनको मितिलाई परिमार्जन गरेर महामारीकै बीचमा भए पनि वैकल्पिक उपायमार्फत पार्टीको जीवनलाई जीवन्त राख्नुपर्ने सुझाब राखेका छन् । ‘राष्ट्रिय महाधिवेशनका लागि केही समस्या हुन सक्छ, त्यसका लागि वैकिल्पक माध्यमबारे छलफल गर्नुपर्ने हो । नभए तल्ला तहको अधिवेशनका लागि ठूलो समस्या देखिँदैन । थोरै–थोरै सख्ंयामा जम्मा भएर महाधिवेशन गर्न सकिन्छ भन्ने कुराहरू राख्यौँ,’ केन्द्रीय सदस्य जीवन परियारले भने, ‘उहाँले पनि सकारात्मक प्रतिक्रिया दिनुभएको छ ।’ नेता परियारले केन्द्रीय महाधिवेशनलाई जिल्लाबाटै मतदान गर्ने व्यवस्था गर्न सकिने वा अन्य विकल्पबारे छलफल गर्नुपर्ने बताएका छन् । ‘महाधिवेशन पार्टीको साझा दायित्व हो, यो वा त्यो गुट वा नेताले काम गरेन भन्ने आधारमा महाधिवेशनलाई छल्नु हँुदैन,’ उनले भने ।
मंगलबारबाट क्रियाशीलको विवरण अपडेट गर्ने काम सकिएपछि त्यसैका आधारमा छानबिन समितिको बैठक बसेर एउटा निर्णयमा पुग्नुपर्ने उनले बताए । कांग्रेसले भदौ ७ देखि १० गतेसम्म काठमाडौंमा १४औँ महाधिवेशन गर्ने गरी तल्ला तहको अधिवेशन तोकेको छ ।