नेपाली कांग्रेसका सभापति शेरहादुर देउवाले अर्को कार्यकाल पार्टीको सभापतिको पद सम्हाल्न इच्छुक रहेको संकेत दिएका छन् । १६-१९ भदौमाा पार्टीको महाधिवेशन गर्ने कार्यतालिका पार्टीले अनुमोदन गरेलगत्तै देउवाले शनिबार बिहान प्रदेश १ का आफू निकट केन्द्रीय सदस्यहरूसँग बूढानीलकण्ठमा छलफल गर्दै आफू सभापतिमा दोहोरिने बताएका हुन् ।
स्रोतका अनुसार छलफलका क्रममा सभापति देउवाले संशोधित कार्यतालिकाअनुसार नै महाधिवेशन हुने र आफू सभापतिमा फेरि लड्ने बताएका थिए । देउवाले आफ्नो नेतृत्वमा संविधान कार्यान्वयन भएको र ३ तहको निर्वाचन गराएको जिकिर गर्दै प्रतिनिधिसभामा कांग्रेसले लोकप्रिय मत सबैभन्दा बढी पाए पनि कम सिट जितेको उल्लेख गरेका थिए । देउवाले आफ्नै नेतृत्वमा पार्टीलाई सबैभन्दा ठूलो बनाउने र सरकारको नेतृत्व गरेर कांग्रेसको नीतिगत बाटोबाट मुलुकलाई अगाडि बढाउने दाबी गरेको स्रोतले जनाएको छ ।
सभापति देउवाले महाधिवेशनमा जित्ने गरी काम गर्न केन्द्रीय सदस्यहरूलाई निर्देशनसमेत दिएको बताइएको छ ।
उक्त छलफलमा पार्टीका सहमहामन्त्री सुनिल थापा, केन्द्रीय सदस्यहरू ज्ञानेन्द्रबहादुर कार्की, मीन विश्वकर्मा, सीता गुरुङ, बाबुराम बस्नेत, डा. डीला संग्रौला, सुजाता परियारलगायत नेताहरू सहभागी थिए ।
देउवाले आगामी महाधिवेशनलाई केन्द्रमा राखेर छलफल गर्न सातै प्रदेशका केन्द्रीय सदस्यहरूसँग छुट्टाछुट्टै भेट्ने कार्यक्रम राखेको जनाइएको छ ।