निर्वाचन आयोगले जनता समाजवादी पार्टी (जसपा) को महन्थ ठाकुर-राजेन्द्र महतो खेमासँग लिखित जवाफ मागेको छ ।
अस्ति ४ असार मा उपेन्द्र यादव खेमाले केन्द्रीय कार्यकारिणी समितिको निर्णयसहित आधिकारिकतासम्बन्धी विवाद निरुपण गरिपाउँ भनी निर्वाचन आयोगमा निवेदन दिएपछि आइतबार आयोगले उक्त दावीबारे महन्थ ठाकुर खेमासँग लिखित जवाफ माग गरेको हो ।
आयोगले यादव खेमाका दावीको विषयमा लिखित जवाफ पेश गर्न महन्थ ठाकुर खेलालाई १५ दिनको सूचना दिएको छ ।
आयोगको आदेशमा भनिएको छ, '... राजनीतिक दलसम्बन्धी ऐन २०७३ को दफा ४३ को खण्ड (ग) बमोजिम ... विवाद निरुपण गरिपाउँ भन्नेसमेत व्यहोराको निवेदन २०७८/३/४ मा दर्ता हुन आएकाले राजनीतिक दलसम्बन्धी ऐन २०७३ को दफा ४४ को उपदफा २ बमोजिम निवेदन दावीका सम्बन्धमा लिखित जवाफ पेश गर्नका लागि यस्तो दावी तथा प्रमाणको प्रतिलिपी संलग्न गरी जनता समाजवादी पार्टी, नेपालका अध्यक्ष महन्थ ठाकुर पक्षलाई १५ दिनको सूचना दिने ... ।
जसपाको उपेन्द्र यादव र महन्थ ठाकुर खेमाले एक अर्को खेमालाई कारबाही गरी दल दर्ता किताबमा रहेको विवरण सच्याउन यसअघि दिएको निवेदनलाई दुबै पक्षको दावी नपुग्ने भनी आयोगले खारेज गरेको थियो । साथै उक्त विवाद दलको आधिकारिकतासम्बन्धी भएको भन्दै आयोगले राजनीतिक दलसम्बन्धी ऐनको दफा ४४ अनुसार गरी आउन दुवै खेमालाई आग्रह गरेको थियो । आयोगको उक्त आग्रहपछि उपेन्द्र यादव खेमाले ४ असारमा केन्द्रीय कार्यकारिणी समितिको निर्णयसहित दलको आधिकारिकता दावी गर्दै निवेदन दिएको थियो ।
राजनीतिक दलसम्बन्धी ऐन, २०७३ को दफा ४४ (१) मा 'दफा ४३ वमोजिम दलको नाम, छाप, झण्डा वा चिन्हसम्बन्घी विवाद भए त्यस्तो नाम, छाप, विधान, झण्डा वा चिन्ह दावी गर्ने दलले र दलको पदाधिकारी, केन्द्रीय समिति वा केन्द्रीय समितिको आधिकारिकतासम्बन्धी विवाद भए त्यस्तो पदाधिकारी, केन्द्रीय समिति वा केन्द्रीय समितिको निर्णयको आधिकारिता दावी गर्ने पक्षले दलको केन्द्रीय समितिको चालीस प्रतिशत सदस्यको हस्ताक्षरसहित विवाद प्रारम्भ भएको मितिले ३० दिनभित्र आयोगमा आधार र प्रमाणसहित दावी पेश गर्नुपर्नेछ' लेखिएको छ ।
त्यस्तै, सोही दफाको उपदफा (२) मा आयोगले उक्त दलको अर्को खेमालाई लिखित जवाफ पेश गर्न १५ दिने सूचना दिने प्रावधान राखिएको छ भने उपदफा (३) मा उपदफा (२) बमोजिमको लिखित जवाफ आधार प्रमाणसहित पेश गर्नुपर्ने भन्ने व्यवस्था गरिएको छ ।