अर्थमन्त्री जनार्दन शर्माले प्रस्तुत गरेको मुलुकको आर्थिक स्थितिसम्बन्धी वक्तव्यमाथि राष्ट्रियसभाका सांसदहरूले बजेटलाई प्रतिस्थापन गर्ने विधेयक कहिले आउँछ ? भनी प्रश्न गरेका छन् ।
सांसद डा. खिमलाल देवकोटाले अर्थमन्त्रीले वैदेशिक ऋण बढेको उल्लेख गरेकाले उनलाई ऋणबिना नै अघि बढ्न लागिएको हो ? भनी प्रश्न गरे । नेपाली कांग्रेसका प्रकाश पन्थले अपाङ्गता भएकाहरूले सामाजिक सुरक्षा भत्ता पाउनुपर्नेमा जोड दिए ।
सांसद प्रमिला देवीले पछाडि परेका नागरिकका लागि विशेष व्यवस्था हुनुपर्ने बताइन् भने सांसद उदया शर्मा पौडेलले गरी खाने वर्गले खोप पाउनुपर्ने माग गरिन् । सांसद रामनारायण बिडारीले कृषिमा वैदेशिक लगानी भित्र्याउने कि यो क्षेत्रलाई आत्मनिर्भर बनाउने ? भनी सरकार प्रष्ट हुनुपर्ने बताए । सांसद ठगेन्द्रप्रकाश पुरीले अध्यादेश बजेट प्रतिस्थापन विधेयक कहिले आउँछ ? भनी प्रश्न गर्दै त्यसमा राप्ती लोकमार्गले प्राथकिता पाउनुपर्नेमा जोड दिए ।
सांसद देवेन्द्र दाहालले प्रतिस्थापन विधेयकमा यसअघिको सरकारले ल्याएको बजेटभन्दा नयाँ बजेट ल्याउन लागेको कि त्यही बजेटको आकार मात्र बढाउन लागिएको हो ? भनी प्रश्न गरे । नेपाल कम्युनिस्ट पार्टी (एमाले)की तुलसाकुमारी दाहालले पहिलो पटक कोरोनाको परीक्षण हङकङमा पठाइएकामा अहिले परीक्षण र उपचारमा नेपाल धेरै अघि बढिसकेको बताइन् ।
सांसद भैरवसुन्दर श्रेष्ठ श्वेतपत्रमा यो सरकार ५ दलीय गठबन्धन भन्ने उल्लेख भएको भन्दै ती दल कुनकुन हुन् ? भनी प्रश्न गरे । नेपाली कांग्रेसकी अनिता देवकोटाले यसअघिको सरकारले अध्ययन नै नगरी भर्चुअल उद्घाटन भएका सडकको अवस्थाका बारेमा जिज्ञासा राखिन् । नेकपा (एमाले)की सांसद भगवती न्यौपानेले माओवादी केन्द्र पटक पटक सरकारमा संलग्न भएकाले विगतमा भएका कमजोरीको जिम्मेवारी पनि लिनुपर्नेमा जोड दिइन् ।
सांसद डा. विमला राई पौडेलले ४ महिनाभन्दा बढी समय भारतले गरेको नाकाबन्दीले अर्थतन्त्रमा नकारात्मक असर गरेको उल्लेख गर्दै गत आर्थिक वर्षमा कोभिड संक्रमणका कारण राजस्व कम र खर्च बढ्दा संचिती घटेको उल्लेख गरिन् । सांसद कोमल वलीले कोभिडको प्रभाव कृषि, उद्योग, पर्यटनमा कति परेको र त्यसविरुद्ध लड्न सरकारको तयारी के छ भन्ने विषयमा अर्थमन्त्री शर्मासँग जानकारी मागिन् ।
सांसद विमला घिमिरेले सामाजिक सुरक्षा कार्यक्रममा के कुरा दोहोरिएको छ ? भनी प्रश्न गर्दै अघिल्लो सरकारले स्वास्थ्यमा छुट्याएको बजेटले निरन्तरता पाउँछ या पाउँदैन भनी जिज्ञासा राखिन् ।
