निर्वाचन आयोगले यही ३० वैशाखमा हुने स्थानीय तहको निर्वाचनमा विभिन्न पदमा उम्मेदवारी दिनेहरूका लागि फरकफरक धरौटी रकम राख्नुपर्ने व्यवस्था गरेको छ ।
स्थानीय तह निर्वाचन निर्देशिका, २०७८ मा उम्मेदवारी दिँदा राख्नुपर्ने धरौटी रकमबारे स्पष्ट उल्लेख गरिएको छ ।
वडा सदस्य, वडा अध्यक्ष, उपाध्यक्ष, प्रमुख वा उपप्रमुखलगायतका पदमा उम्मेदवारी दिँदा निश्चित रकम धरौटी राख्नुपर्नेछ ।
निर्देशिकाअनुसार वडा सदस्य पदका लागि ५०० रुपैयाँ र वडा अध्यक्ष पदमा उम्मेदवारी दिँदा १ हजार रुपैयाँ धरौटी राख्नुपर्नेछ ।
यस्तै, अध्यक्ष, उपाध्यक्ष, प्रमुख वा उपप्रमुख पदका लागि १ हजार ५०० रुपैयाँ र गाउँकार्यपालिका वा नगर कार्यपालिका सदस्य पदका लागि ५०० रुपैयाँ धरौटी राख्नुपर्ने निर्देशिकामा उल्लेख छ ।
जिल्ला समन्वय समितिको सदस्य पदका लागि १ हजार ५०० रुपैयाँ र जिल्ला समन्वय समितिको प्रमुख वा उपप्रमुख पदका लागि २ हजार रुपैयाँ धरौटी राख्नुपर्ने प्रावधान राखिएको छ ।
महिला र दलित वा अल्पसंख्यक समुदाय वा आर्थिक रूपले विपन्न व्यक्तिको हकमा धरौटी रकममा ५० प्रतिशत छुट हुने निर्देशिकामा जनाइएको छ ।
‘कुनै एउटा पदको निर्वाचनमा एक व्यक्तिलाई उम्मेदवार मनोनयन गर्नका लागि एकभन्दा बढी मनोनयनपत्र दाखिला गर्नुपरेमा एउटा मनोनयनपत्रका लागि मात्र धरौटी राख्नुपर्नेछ’, निर्देशिकामा भनिएको छ ।
