स्थानीय तह निर्वाचनबाट आगामी ५ वर्षका लागि गोरखामा ४९२ जना नयाँ जनप्रतिनिधि चुनिँदै छन् । २ नगरपालिकासहित ११ वटा स्थानीय सरकार रहेको गोरखामा ९४ वटा वडा छन् । अहिले यी सबै स्थानीय तहमा दलहरू चुनावी प्रचारप्रसारमा व्यस्त छन् ।
जिल्लामा सत्तारूढ दल (कांग्रेस, माओवादी, जसपा र नेकपा एस)को गठबन्धनका लागि प्रयास भए पनि भागबन्डा मिलेन । सत्तारूढ दलका शीर्ष नेताहरूको आफ्नो निर्वाचन क्षेत्रमा पकड लिने र शख जोगाउने स्वार्थका कारण गठबन्धन हुन नसकेको हो ।
अहिले कतिपय पालिकामा सत्तारूढ गठबन्धनका दलहरू एकल प्रतिस्पर्धामा छन् भने कतिपय ठाउँमा गठबन्धन पनि गरेका छन् । गठबन्धन नभएको र आफूहरू कमजोर भएको गृहपालिकामा सबै राजनीतिक दलका शीर्ष नेताहरू जोडबलका साथ आफ्ना उम्मेदवारलाई जिताउने अभियानमा खटिरहेका छन् ।
पालुङटारमा सबैकाे ध्यान
जनता समाजवादी पार्टीका संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराई गत शुक्रबारदेखि गृहनगर पालुङटारमा चुनावी अभियानमा सक्रिय छन् । उनले आफ्नो पार्टीको प्रमुख पदका उम्मेदवारलाई जिताउन कांग्रेससँग गठबन्धन गर्ने अनेक तिकडम अपनाएका थिए । तर, पालुङटार जसपालाई छाड्न कांग्रेस तयार भएन । अन्तत: अहिले त्यहाँ सबै दल एक्लाएक्लै चुनावी प्रतिस्पर्धा गर्दै छन् ।
आफ्ना उमेदवार जिताउने र आफ्नो गृहनगरमा पार्टीको पकड थप बलियो बनाएर शाख जोगाउने भट्टराईको सपना गठबन्धनले पूरा गर्न सकेन । त्यसैले उनी एक सातादेखि गोरखा नछाडेर पालुङटार केन्द्रित चुनावी प्रचारप्रसारमा व्यस्त छन् । भट्टराईको सचिवालयका अनुसार उनी कहिले बिहान ६ देखि राति १२ बजेसम्म चुनावी कार्यक्रममा सहभागी हुने गरेका छन् ।
तर, पनि उनलाई गृहनगरमा आफ्ना उम्मेदवार जिताउन निकै धौधौ पर्ने देखिन्छ । कारण, प्रमुख पदका उम्मेदवार छान्ने विषयमै नगरपालिकामा जसपाका आन्तरिक टिमबीच झडपसमेत भएको घटना बाहिरियो । त्यस घटनाले पनि त्यहाँ जसपाप्रति नकारात्मक सन्देश प्रवाह गरिरहेकै छ ।
यस्तै, पालुङटार कांग्रेसले बाबुराम आफ्नो शाख जोगाउन गठबन्धनका लागि शेरबहादुर देउवासँग लम्पसार परेको भन्दै प्रचार गरिरहेकै छ । यस कारण पनि जसपाको क्रेजमा कमी आएको छ कि भन्ने आशंका उब्जाएको छ । यद्यपि, अहिले जसपा नेताले नगरपालिकामा आफूहरू पहिलो शक्तिको रूपमा उदाएको दाबी गर्ने गरेका छन् ।
२०७४ सालको स्थानीय तहको मत परिणाम हेर्दा पालुङटार नगरपालिकामा कांग्रेस पहिलो, माओवादी दोस्रो र जसपा तेस्रो र एमाले चौथौ शक्तिका रूपमा थिए ।
