काठमाडौं । वावाङ्मय शताब्दी पुरुष सत्यमोहन जोशीको शब्दमा रहेको `माया रानीलाई´ बोलको गीत सार्वजनिक भएको छ। गीतमा सङ्गीतकार एवं गायक सन्तोष श्रेष्ठले सङ्गीत तथा स्वर दिएका छन्।

शताब्दी पुरुष जोशीले २००१ सालमा लेखेको गीत 'माया रानीलाई' ७८ वर्षपछि रेकर्ड गरी भिडियो निर्माणको क्रममा रहँदै जोशी अस्वस्थ भएकाले गीत सार्वजनिक गर्न ढिलाइ भएको सङ्गीतकार/गायक श्रेष्ठले जानकारी दिए।

श्रेष्ठले भने, 'हामी उहाँको शीघ्र स्वास्थ्यलाभको कामना गरेर बसेका थियौँ । तर, दुर्भाग्य ! गीत रिलिज हुन नपाउँदै उहाँको असामयिक निधन भयो । हामी स्तब्ध भयौँ । उहाँप्रति हार्दिक श्रद्धासुमन !' वाङ्मय शताब्दी पुरुषको गीतको यो पहिलो भिडियो हो ।

श्रव्य-दृश्य तयार गरेर शताब्दी पुरुष जोशीलाई देखाएपछि सार्वजनिक गर्ने एउटा सपना अधुरो रहेको गायक श्रेष्ठले दुखेसो पाेखे। राज पोखरेल र प्रकाश अर्यालको छायाङ्कनलाई टेकेन्द्र शाहले सम्पादन गरेका छन् भने हेम प्रभास अधिकारीले निर्देशन गरेका छन् । `माया रानीलाई´ गोल्डेन क्रियसनको च्यानलबाट सार्वजनिक गरिएको छ।