अर्शदीप सिंहले ४ विकेट लिएपछि पञ्जाब किंग्सले मुम्बई इन्डियन्सलाई हराएको छ ।
इन्डियन प्रिमियर लिग (आईपीएल)अन्तर्गत वाङ्खेडे स्टेडियममा गए राति भएको खेलमा पञ्जाब १३ रनले विजयी भएको हो ।
पञ्जाबले दिएको २१५ रनको लक्ष्य पछ्याएको मुम्बईले २० ओभरमा ६ विकेट गुमाउँदै २०१ रन मात्र बनाउन सक्यो । मुम्बईका लागि क्यामरुन ग्रिन र सूर्यकुमार यादवले अर्धशतक प्रहार गरे ।
ग्रिनले ४३ बलमा ६ चौका र ३ छक्का प्रहार गर्दै ६७ रन बनाउँदा यादवले २६ बलमा ७ चौका र ३ छक्का प्रहार गर्दै ५७ रनको योगदान गरे ।
कप्तान रोहित शर्माले २७ बलमा ४ चौका र ३ छक्कासहित ४४ रन बनाए । टिम डेभिडले नटआउट २५ रनको योगदान गरे ।
बलिङतर्फ पञ्जाबका अर्शदीप सिंहले ४ विकेट लिँदा नाथन इलिस र लियम लिभिङ्स्टोनले १/१ विकेट लिए ।
टस हारेर ब्याटिङको निम्तो पाएको पञ्जाबले ८ विकेटको क्षतिमा २१५ रन बनाएको थियो ।
पञ्जाबका लागि कप्तान साम कुरानले २९ बलमा ५ चौका र ४ छक्काको मद्दतबाट ५५ रन बनाए ।
हरप्रीत सिंहले २८ बलमा ४ चौका र २ छक्का प्रहार गरी ४१ रन बनाए । अथर्व ताइडेले २९, प्रभसिम्रन सिंहले २६, जितेस शर्माले २५ र म्याथ्यु सर्टले ११ रनको योगदान गरे ।
बलिङमा मुम्बईका क्यामरुन ग्रिन र पियुस चावलाले २ विकेट लिए । अर्जनु तेन्डुलकर, जेसन बेरेन्ड्रफ र जोफ्रा आर्चरले समान १/१ विकेट लिए ।
जितसँगै पञ्जाब ८ अंकसहित तालिकाको पाँचौँ स्थानमा पुगेको छ । मुम्बई ६ अंकसहित सातौँ नम्बरमा छ ।
