एसीसी प्रिमियर कपअन्तर्गत नेपाल र साउदी अरेबियाबीचको खेल वर्षाले प्रभावित भएको छ ।
मूलपानी मैदान बिहान ९ बजे सुरु हुने पर्ने वर्षाले प्रभावित भएको हो ।खेलअघि गरिने टस वर्षाका कारण ढिलाइ भएको छ । हिजो साँझदेखि परेको वर्षाका कारण मैदान भिजेको छ ।
अहिले पिचमा कभर लगाइएको छ । सो कभर हटाइएपछि मात्र टसबारे निर्णय हुनेछ । बिहान साढे ११ बजेसम्म २ पटक कभर हटाइए पनि फेरि वर्षा भएका कारण कभरले पिच छोपिएको छ ।
दिउँसो २ बजेसम्म पनि टस हुन नसके खेल रद्द हुनेछ । खेल रद्द भएमा नेपाल सेमिफाइनल पुग्नेछ ।
नेपालले अन्तिम खेलमा बिहीबार कतारसँग खेल्नेछ । सो खेलमा जित हात पारे नेपाल समूह विजेता बन्नेछ ।
नेपालले मूलपानी मैदानमा पहिलो अन्तर्राष्ट्रिय खेल खेल्न लागेको हो ।
समूह ‘ए’मा रहेको नेपालले यसअघि दुवै खेलमा जित हात पारेको थियो । कीर्तिपुरमा नेपालले मलेसिया र ओमानमाथि जित हात पारेको थियो ।
समूहको शीर्ष स्थानमा रहेको नेपालले आजको खेलमा जित हात पारे सेमिफाइनल पुग्नेछ ।
नेपाल र साउदीबीच सन् २०१२ पछि प्रतिस्पर्धा हुन लागेको हो । सन् २०१२ मा अबुधावीमा एसीसी ट्रफीको खेलमा नेपालले ९ विकेटको जित हात पारेको थियो ।
सो खेलमा ज्ञानेन्द्र मल्लले २३ बलमा नटआउट ६१ रन जोडेका थिए । पहिले ब्याटिङ गरेको साउदी १३१ रनमै अलआउट भएको थियो, जुन लक्ष्य नेपालले १३.१ ओभरमै पार गरेको थियो ।
१ दशकपछिको साउदी टिममा निकै सुधार आइसकेको छ । साउदीले जारी प्रतियोगिताको पहिलो खेलमा कतारमाथि ७ विकेटको जित हात पारेको थियो ।